విజయవాడ: మాజీ మంత్రి, తెలుగుదేశం పార్టీ సీనియర్‌ నేత దేవినేని నెహ్రూ సోమవారం ఉదయం కన్నుమూశారు. కొద్దిరోజులుగా కిడ్నీ సంబంధిత వ్యాధితో బాధపడుతున్న ఆయన హైదరాబాద్‌లోని ఓ ప్రైవేటు ఆస్పత్రిలో సోమవారం ఉదయం 5 గంటల సమయంతో గుండెపోటుతో తుదిశ్వాస విడిచారు. ఆయన అసలు పేరు దేవినేని రాజశేఖర్‌. నెహ్రూ ఒక అబ్బాయి… ఒక అమ్మాయి ఉన్నారు. మరణవార్త తెలుసుకున్న నెహ్రూ కుటుంబసభ్యులు హుటాహుటిన హైదరాబాద్‌ బయలుదేరారు. నెహ్రూ ఆకస్మిక మృతితో ఆయన అనుచరులు, అభిమానులు ఒక్కసారిగా షాక్‌ గురయ్యారు.ప్రముఖుల సంతాపం
దేవినేని నెహ్రూ మృతిపట్ల పలువురు ప్రముఖులు తీవ్ర దిగ్భ్రాంతి వ్యక్తం చేస్తున్నారు. ఆంధ్రప్రదేశ్‌ శాసనసభ స్పీకర్‌ కోడెల శివప్రసాదరావు, ముఖ్యమంత్రి చంద్రబాబునాయుడు, మాజీ ఎంపీ కంభంపాటి రామ్మోహన్‌రావు, పలువురు మంత్రులు, ఎమ్మెల్యేలు, నేతలు సంతాపం ప్రకటించారు. నెహ్రూ ఆకస్మిక మృతి తనకు, పార్టీకి తీరని లోటని చంద్రబాబు అన్నారు.
