సామాజిక మాధ్యమం
అదొక ప్రభంజనం,
జగమంతా విస్తరించిన
మాయాజాలం.
విజ్ఞాన విధ్వంస సమ్మిళితం,
దుర్మార్గాన్ని ప్రేరేపించే పిశాచం.
ఆకర్షిస్తుంది ఆయస్కాంతమై,
అలరిస్తుంది కల్పతరువై.
దూరపోళ్ళను దగ్గర చేస్తూ,
దగ్గరోళ్లను దూరం చేసే
మానవసంబంధాలను మాయచేసే
మంత్ర దండమిది.
పరిచయం అవసరంలేని
ఈ ప్రపంచంలో
ఫలించని స్వప్నాలకోసం
దీర్ఘమౌనాల్ని బద్దలు కొడుతూ
గళమెత్తే గొంతులెన్నో.

సర్వజన సమ్మోహిని,
సమస్త కార్యవాహిని,
సకల కళాకారిణి అయిన
రెండంచుల ఈ పదును కత్తిని వాడొచ్చు
వినాశనానికైనా, లోకాకళ్యాణానికైనా!
ఆ ప్రవాహంలో కొట్టుకుపోకపోతే
ప్రతి మనిషి పరిమళించే పువ్వే.
అభివృద్ధికి ఆసరా అయిన
ఈ ప్రసార మాధ్యమంతో
అంబరాన్ని చుంబిస్తావో,
అధఃపాతాళానికి పోతావో
నిర్ణయం నీదే ఓ మనిషీ!

వేమూరి శ్రీనివాస్
9912128967
తాడేపల్లిగూడెం

హామీపత్రం
“మోహిని” అను ఈ కవిత పూర్తిగా నా స్వంతం.దేనికీ అనువాదం,అనుకరణ కాదు.ఎక్కడా ప్రచురింపబడలేదు. సోషల్ మీడియాలో పెట్టియుండలేదు.ఈ కవితకి సంబంధించిన పూర్తి బాధ్యత నాదే.
వేమూరి శ్రీనివాస్, 9912128967, తాడేపల్లిగూడెం