జడ్చర్ల ముదిరాజ్ సంఘం

జడ్చర్ల, సెప్టెంబర్ 4 (జనంసాక్షి): స్వాతంత్ర్య సమరయోధుడు, హైదరాబాద్ మాజీ మేయర్, బడుగు బలహీన వర్గాల ఆశాజ్యోతి కొరివి కృష్ణస్వామి ముదిరాజ్ ఆశయ సాధనకు ప్రతి ఒక్కరూ కృషి చేయాలని ముదిరాజ్ సంఘం నాయకులు పిలుపునిచ్చారు. శుక్రవారం జడ్చర్ల పట్టణంలోని పూలే, అంబేడ్కర్ చౌరస్తాలో ముదిరాజ్ సంఘం ఆధ్వర్యంలో కొరివి కృష్ణస్వామి ముదిరాజ్ జయంతి వేడుకలు ఘనంగా నిర్వహించారు. ఈ సందర్భంగా ఏర్పాటు చేసిన కార్యక్రమంలో నాయకులు ఆయన చిత్రపటానికి పూలమాలలు వేసి ఘనంగా నివాళులర్పించారు. అనంతరం నాయకులు మాట్లాడుతూ హైదరాబాద్ నగర సమగ్ర అభివృద్ధికి, బడుగు బలహీన వర్గాల అభ్యున్నతికి కృష్ణస్వామి ముదిరాజ్ చేసిన సేవలు అతులితమని కొనియాడారు. స్వాతంత్ర్య ఉద్యమంలో ఆయన చూపిన పోరాట పటిమ, సామాజిక సమానత్వం కోసం పడిన తపన నేటి తరానికి ఆదర్శనీయమని పేర్కొన్నారు. హైదరాబాద్ మేయర్‌గా ఆయన అందించిన విశిష్ట పాలన, తీసుకువచ్చిన సామాజిక సంస్కరణలు చిరస్మరణీయమని గుర్తుచేశారు. ఆయన వేసిన బాటలో నడుస్తూ, ఆయన ఆశయాలను ముందుకు తీసుకెళ్లడమే మనం ఇచ్చే నిజమైన నివాళి అని వక్తలు అన్నారు. కార్యక్రమంలో ముదిరాజ్ సంఘం ప్రతినిధులు, మహిళా నాయకురాలు, వివిధ ప్రజా సంఘాల నాయకులు, యువకులు తదితరులు పాల్గొన్నారు.