జీవనోపాధిపై దెబ్బకొడితే ఊరుకోం : సర్కార్‌ను హెచ్చరించిన గౌడ

గౌడ సంఘం ఆందోళనతో గోడౌన్ల వద్ద తీవ్ర ఉద్రిక్తత

మహబూబ్ నగర్ బ్యూరో సెప్టెంబర్ 10(జనం సాక్షి) : మహబూబ్‌నగర్ జిల్లాలో మద్యం, కల్లు దుకాణాల కేటాయింపు వ్యవహారం తీవ్ర ఉద్రిక్తతకు దారితీసింది. తరతరాలుగా కల్లు గీత వృత్తినే నమ్ముకుని జీవిస్తున్న గౌడ కులస్తులకే ఈ దుకాణాలను కేటాయించాలని డిమాండ్ చేస్తూ గౌడ సంఘం నాయకులు పెద్ద ఎత్తున ఆందోళనకు దిగారు. గోడౌన్లలో వేల సంఖ్యలో మద్యం క్రేట్లు సిద్ధంగా ఉంచినప్పటికీ, లైసెన్సులను మాత్రం ఇతరులకు కట్టబెట్టడంపై వారు తీవ్ర ఆగ్రహం వ్యక్తం చేస్తున్నారు. ఇది తమ జీవనోపాధిని దెబ్బతీయడమేనని ఆరోపిస్తూ, గౌడ కులస్తులకే దుకాణాలు ఇవ్వకుంటే జిల్లాలో ఏ ఒక్క దుకాణాన్ని కూడా నడవనివ్వబోమని హెచ్చరించారు. ప్రభుత్వం వెంటనే స్పందించి న్యాయం చేయాలని, లేనిపక్షంలో రాష్ట్రవ్యాప్తంగా ఉద్యమిస్తామని స్పష్టం చేశారు.

రెండు వర్గాల మధ్య విభేదాలు

భారీగా పోలీసుల మోహరింపు.. మరోవైపు ఈ దుకాణాల లైసెన్సుల కోసం ఇతర వర్గాల వారు కూడా గట్టిగా ప్రయత్నిస్తుండటంతో వ్యవహారం రెండు వర్గాల మధ్య ఘర్షణ వాతావరణానికి దారితీసింది. “ఇన్ని సంవత్సరాలుగా మేము చేస్తున్న వృత్తిని వేరే వారికి ఎలా ఇస్తారు?” అంటూ గౌడ సంఘం అడ్డుకుంటుండటంతో గోడౌన్ల వద్ద తీవ్ర ఉద్రిక్తత నెలకొంది. ఇరు వర్గాలు పోటీ పడుతుండటంతో పరిస్థితి చేజారకుండా చూసేందుకు అధికారులు, భారీగా పోలీసులు రంగంలోకి దిగారు. ముందస్తు జాగ్రత్త చర్యగా అదనపు బలగాలను మోహరించి, ఇరు వర్గాలను శాంతింపజేసేందుకు ప్రయత్నిస్తున్నారు.