– అభివృద్ధి పనులు వేగవంతం చేయాలని ఎమ్మెల్యే బండారి లక్ష్మారెడ్డి ఆదేశం

ఉప్పల్ మే 03 ( జనం సాక్షి ):ఉప్పల్ మున్సిపల్ కార్యాలయంలో ప్రజా పాలన ప్రగతి ప్రణాళికలో భాగంగా చేపట్టిన 99 రోజుల కార్యాచరణ ప్రణాళిక అమలుపై కీలక సమీక్ష సమావేశం నిర్వహించారు. ప్రజలకు మెరుగైన సేవలు అందించేందుకు ప్రభుత్వం ప్రతిష్టాత్మకంగా అమలు చేస్తున్న ఈ కార్యక్రమం పురోగతిని సమగ్రంగా పరిశీలించేందుకు నిర్వహించిన ఈ సమావేశానికి ఉప్పల్ ఎమ్మెల్యే బండారి లక్ష్మారెడ్డి గారు ముఖ్య అతిథిగా హాజరయ్యారు.

మున్సిపల్ పరిధిలో జరుగుతున్న అభివృద్ధి పనులు, ప్రజలకు అందుతున్న సేవలు, పెండింగ్‌లో ఉన్న సమస్యలు, వివిధ శాఖల సమన్వయం వంటి అంశాలపై ఎమ్మెల్యే అధికారులతో విస్తృతంగా చర్చించారు. ప్రజా సమస్యల పరిష్కారమే ప్రభుత్వ ప్రధాన లక్ష్యమని పేర్కొంటూ, 99 రోజుల కార్యాచరణ ప్రణాళికను అధికారులు అత్యంత బాధ్యతాయుతంగా అమలు చేయాలని ఆయన సూచించారు.ఈ సందర్భంగా ఎమ్మెల్యే మాట్లాడుతూ, ప్రజలకు నేరుగా ఉపయోగపడే పనులపై ప్రత్యేక దృష్టి పెట్టాలని అధికారులను ఆదేశించారు. ముఖ్యంగా మౌలిక వసతుల అభివృద్ధి, పారిశుద్ధ్య నిర్వహణ, తాగునీటి సరఫరా, రహదారుల మరమ్మతులు, డ్రైనేజ్ వ్యవస్థ బలోపేతం, వీధి దీపాల నిర్వహణ వంటి సమస్యల పరిష్కారంలో ఎలాంటి నిర్లక్ష్యం ఉండకూడదన్నారు. ప్రజలకు ఇబ్బందులు కలిగించే అంశాలను వెంటనే గుర్తించి తక్షణ చర్యలు తీసుకోవాలని సూచించారు.ప్రతి శాఖ తమకు అప్పగించిన పనులను సమయపాలనతో పూర్తి చేయాలని, పనుల నాణ్యత విషయంలో రాజీ పడకూడదని ఎమ్మెల్యే స్పష్టం చేశారు. ప్రజలు ప్రభుత్వంపై విశ్వాసం ఉంచేలా సేవలు అందించాలని, కార్యాలయాలకు వచ్చే ప్రతి పౌరుడితో మర్యాదపూర్వకంగా వ్యవహరించాలని అధికారులకు సూచించారు. ప్రజల ఫిర్యాదులపై ఆలస్యం చేయకుండా స్పందించి, సమస్యలను వేగంగా పరిష్కరించే విధంగా చర్యలు తీసుకోవాలని తెలిపారు.అభివృద్ధి కార్యక్రమాలు కేవలం కాగితాలకే పరిమితం కాకుండా ప్రజలకు ప్రత్యక్ష ప్రయోజనం కలిగేలా ఉండాలని ఆయన పేర్కొన్నారు. ప్రతి ప్రాంతంలో జరుగుతున్న పనులను అధికారులు క్రమం తప్పకుండా పరిశీలించి, అవసరమైన చోట ప్రత్యేక చర్యలు తీసుకోవాలని ఆదేశించారు.ఈ సమావేశంలో జోనల్ కమిషనర్ రాధిక గుప్త, డిప్యూటీ కమిషనర్ మరియు మున్సిపల్ శాఖలకు చెందిన వివిధ విభాగాల అధికారులు పాల్గొని తమ శాఖల పనితీరుపై వివరాలు వెల్లడించారు. ప్రణాళికలో భాగంగా చేపట్టాల్సిన పనుల పురోగతి, ఎదురవుతున్న సమస్యలు, వాటి పరిష్కార మార్గాలపై చర్చించారు.ఉప్పల్ ప్రాంత అభివృద్ధికి ప్రభుత్వం కట్టుబడి ఉందని, ప్రజలకు మెరుగైన సౌకర్యాలు అందించడమే లక్ష్యంగా అధికారులు సమన్వయంతో పనిచేయాలని ఎమ్మెల్యే బండారి లక్ష్మారెడ్డి పిలుపునిచ్చారు.