చారిత్రాత్మక గచ్చుబావి వద్ద ఏర్పాట్లు

గచ్చు బావి పరిరక్షణ కమిటీ సభ్యులు

జడ్చర్ల, మే 30 (జనంసాక్షి): తెలంగాణ ఆవిర్భావ దినోత్సవాన్ని పురస్కరించుకుని జూన్ 2వ తేదీన స్థానిక చారిత్రాత్మక గచ్చు బావి ప్రాంగణంలో భారీ రక్తదాన శిబిరం నిర్వహించనున్నట్లు గచ్చు బావి పరిరక్షణ కమిటీ సభ్యులు శనివారం ఒక ప్రకటనలో తెలిపారు. సుమారు 300 సంవత్సరాల ఘన చరిత్ర కలిగిన గచ్చుబావి ఆవరణంలో ఈ కార్యక్రమాన్ని అత్యంత ప్రతిష్టాత్మకంగా నిర్వహించేందుకు అన్ని ఏర్పాట్లు పూర్తి చేసినట్లు వారు వెల్లడించారు. జూన్ 2న ఉదయం 8 గంటలకు జాతీయ జెండా ఆవిష్కరణతో వేడుకలు ప్రారంభమవుతాయని, అనంతరం ఉదయం 8:30 గంటలకు సామూహిక హనుమాన్ చాలీసా పారాయణం నిర్వహిస్తామని నిర్వాహకులు పేర్కొన్నారు. ఆ తర్వాత ఉదయం 9 గంటల నుండి మధ్యాహ్నం 12 గంటల వరకు ఇండియన్ రెడ్ క్రాస్ సొసైటీ ఆధ్వర్యంలో భారీ రక్తదాన శిబిరం కొనసాగుతుందని వివరించారు. తెలంగాణ రాష్ట్ర సాధన కోసం తమ ప్రాణాలను సైతం లెక్కచేయకుండా పోరాడిన అమరవీరుల స్మరణార్థం, వారికి నిజమైన నివాళిగా ఈ సేవా కార్యక్రమాన్ని చేపడుతున్నట్లు నిర్వాహకులు తెలిపారు. ప్రస్తుత సమాజంలో సకాలంలో రక్తం అందక ఎంతో మంది ప్రాణాలు కోల్పోతున్నారని, ఈ కొరతను తీర్చడానికి ప్రతి ఒక్కరూ ముందుకు రావాలని కోరారు. ముఖ్యంగా యువత, మహిళలు, ప్రజాప్రతినిధులు, సామాజిక కార్యకర్తలు పెద్ద సంఖ్యలో పాల్గొని రక్తదానం చేయాలని పిలుపునిచ్చారు. రక్తదానం చేయడం వల్ల ఇతరుల ప్రాణాలు కాపాడటమే కాకుండా, రక్తదాతల ఆరోగ్యానికి కూడా ఎంతో మేలు జరుగుతుందని వైద్య నిపుణులు సూచిస్తున్నట్లు కమిటీ సభ్యులు ఈ సందర్భంగా గుర్తుచేశారు. అలాగే రక్తదానం చేసిన అనంతరం చారిత్రాత్మక గచ్చు బావి వద్ద సెల్ఫీలు దిగి, వాటిని సామాజిక మాధ్యమాల్లో పంచుకోవడం ద్వారా ఈ పురాతన కట్టడం యొక్క ప్రాశస్త్యాన్ని, విశిష్టతను ప్రపంచానికి చాటి చెప్పాలని కోరారు. తెలంగాణ ఆవిర్భావ దినోత్సవం నాడు తలపెట్టిన ఈ మహత్తర సేవా కార్యక్రమాన్ని విజయవంతం చేయడానికి జడ్చర్ల పట్టణ, పరిసర ప్రాంత ప్రజలు సహకరించి విజయవంతం చేయాలని గచ్చు బావి పరిరక్షణ కమిటీ సభ్యులు విజ్ఞప్తి చేశారు.