మంథని, (జనంసాక్షి) : భూ సమస్యలను పరిష్కరించేందుకే రాష్ట్ర ముఖ్యమంత్రి రేవంత్ రెడ్డి ప్రతిష్టాత్మకంగా భూభారతి చట్టాన్ని అమలు చేస్తున్నారని కమాన్ పూర్ సింగిల్ విండో చైర్మన్ ఇనగంటి భాస్కర్ రావు అన్నారు. జూన్ 3 నుంచి జూన్ 20 వరకు రాష్ట్రవ్యాప్తంగా నిర్వహిస్తున్న రెవెన్యూ సదస్సుల్లో భాగంగా కమాన్ పూర్ మండలం జూలపల్లి గ్రామంలో ఏర్పాటు చేసిన రెవెన్యూ సదస్సులో ఆయన పాల్గొని తాసిల్దార్ వాసంతి తో కలిసి రైతుల వద్ద నుంచి దరఖాస్తులను స్వీకరించారు. ఈ సందర్భంగా భాస్కర్ రావు మాట్లాడుతూ. . భూముల పత్రాలు సర్వేలు, రిజిస్ట్రేషన్లలో ఏర్పడిన లోపాలను సరిచేసి రైతులకు న్యాయం చేయడమే ఈ భూభారతి ముఖ్య ఉద్దేశమని అన్నారు. ఎన్నికలకు ముందు మేనిఫెస్టో కమిటీ చైర్మన్ దుద్దిల్ల శ్రీధర్ బాబు ఇచ్చిన హామీ మేరకు భూభారతి అమలు చేస్తున్నామని తెలిపారు. ఈ సదస్సులో తాజా మాజీ సర్పంచ్ బొల్లపల్లి శంకర్ గౌడ్, మండల తహసిల్దార్ వాసంతి, సీనియర్ అసిస్టెంట్ సతీష్, ఆర్ఐ స్రవంతి, జూనియర్ అసిస్టెంట్లు రజిత, రాజేందర్, రంజిత్, ఆపరేటర్లు ప్రవీణ్, తోట రమేష్, వీఆర్ఏ కట్ట కుమార్, రెవెన్యూ సిబ్బంది పాల్గొన్నారు.