స్థానిక ప్రజలు ఎదుర్కొంటున్న సమస్యలను పరిశీలించి శాశ్వత పరిష్కారానికి హామీ

ఉప్పల్, మే 9: ( జనం సాక్షి )ఉప్పల్ నియోజకవర్గ అభివృద్ధి లక్ష్యంగా నిరంతరం ప్రజల్లోనే ఉంటూ వారి సమస్యలను తెలుసుకుంటున్న బండారి లక్ష్మారెడ్డి ఈరోజు ఉప్పల్ భగాయత్ హెచ్ఎండిఏ లేఔట్ వెస్ట్ ఫేజ్ ప్రాంతంలో విస్తృతంగా పర్యటించారు. కాలనీలోని పలు వీధులు, అపార్ట్మెంట్లు, అంతర్గత రోడ్లను పరిశీలించిన ఎమ్మెల్యే అక్కడి ప్రజలు ఎదుర్కొంటున్న మౌలిక సదుపాయాల సమస్యలను ప్రత్యక్షంగా తెలుసుకున్నారు.ఈ సందర్భంగా స్థానిక నివాసితులు కాలనీలో చాలాకాలంగా కొనసాగుతున్న రోడ్ల దుస్థితి, డ్రైనేజ్ వ్యవస్థ లోపాలు, వర్షాకాలంలో నీటి నిల్వ సమస్యలు, వీధి దీపాల కొరత, పారిశుధ్య సమస్యలు, దోమల వ్యాప్తి వంటి పలు అంశాలను ఎమ్మెల్యే దృష్టికి తీసుకువచ్చారు. ముఖ్యంగా వర్షాలు కురిసే సమయంలో కాలనీలో నీరు నిలిచిపోవడంతో తీవ్ర ఇబ్బందులు ఎదుర్కొంటున్నామని, డ్రైనేజీ వ్యవస్థ సక్రమంగా లేకపోవడంతో అపార్ట్మెంట్ల వద్ద దుర్వాసనలు వస్తున్నాయని స్థానికులు వివరించారు.ప్రజల సమస్యలను శ్రద్ధగా విన్న ఎమ్మెల్యే బండారి లక్ష్మారెడ్డి వెంటనే సంబంధిత అధికారులతో ఫోన్‌లో మాట్లాడి సమస్యలపై సమగ్ర నివేదిక సిద్ధం చేయాలని ఆదేశించారు. కాలనీలో తాత్కాలిక మరమ్మతులతో కాకుండా శాశ్వత పరిష్కారం దిశగా పనులు చేపట్టాలని అధికారులకు సూచించారు. ముఖ్యంగా డ్రైనేజ్ లైన్ల విస్తరణ, రోడ్ల పునర్నిర్మాణం, వీధి దీపాల ఏర్పాటు, పారిశుధ్య నిర్వహణ, వర్షపు నీటి పారుదల వ్యవస్థ మెరుగుదల వంటి అంశాలపై ప్రత్యేక దృష్టి సారించాలని పేర్కొన్నారు.ఈ సందర్భంగా ఎమ్మెల్యే మాట్లాడుతూ, “ప్రజలు ఎదుర్కొంటున్న సమస్యలను ప్రత్యక్షంగా తెలుసుకుని వెంటనే పరిష్కరించడమే నా బాధ్యత. ఉప్పల్ నియోజకవర్గంలోని ప్రతి కాలనీ అభివృద్ధి చెందేలా ప్రభుత్వం తరఫున అవసరమైన నిధులు తీసుకువచ్చి పనులు చేపడతాం. ప్రజలకు ఇబ్బందులు కలగకుండా అధికారులతో సమన్వయం చేసుకుని వేగంగా అభివృద్ధి పనులు పూర్తి చేస్తాం” అని తెలిపారు.అలాగే కాలనీలో వర్షాకాలానికి ముందే నాలాల పూడికతీత పనులు, డ్రైనేజ్ శుభ్రపరిచే కార్యక్రమాలు చేపట్టి ప్రజలకు ఇబ్బందులు తలెత్తకుండా చర్యలు తీసుకుంటామని ఎమ్మెల్యే హామీ ఇచ్చారు. ప్రజలకు అందుబాటులో ఉంటూ ప్రతి సమస్య పరిష్కారానికి కట్టుబడి పనిచేస్తానని ఆయన స్పష్టం చేశారు.ఎమ్మెల్యే పర్యటన సందర్భంగా స్థానిక ప్రజలు తమ సమస్యలను నేరుగా వివరించగా, వెంటనే స్పందిస్తూ పరిష్కారానికి హామీ ఇవ్వడం పట్ల కాలనీవాసులు సంతోషం వ్యక్తం చేశారు. అభివృద్ధి పనుల విషయంలో ఎమ్మెల్యే ప్రత్యేక శ్రద్ధ చూపుతున్నారని స్థానికులు అభినందించారు.ఈ కార్యక్రమంలో భగాయత్ వెల్ఫేర్ అసోసియేషన్ అధ్యక్షులు మేకల మధుసూదన్ రెడ్డి, శివప్రసాద్, డాక్టర్ రాఘవేందర్, శ్రీరామ్, సందీప్, విష్ణువర్ధన్ రెడ్డి, మల్లికార్జున్, కమల్, మహిపాల్, టీవీఎస్ఎస్ కృష్ణమూర్తి, ఆదిత్య, బాలకృష్ణ, నరోత్తం రెడ్డి, శేషాచారి, కృష్ణ, సందీప్ రెడ్డి, గోవర్ధన్ రెడ్డి తదితరులు, వాసవి మెట్రో పోలీస్ అపార్ట్మెంట్ వాసులు, ఇతర అపార్ట్మెంట్ కమిటీ సభ్యులు, యువకులు మరియు స్థానిక ప్రజలు పెద్ద సంఖ్యలో పాల్గొన్నారు.