జిల్లా ఎస్పీ జే.రంజాన్ రతన్ కుమార్ మాట్లాడుతూ దేశం కోసం ఎంతో మంది జవాన్లు తమ ప్రాణాలను అర్పించారన్నారు. ప్రజా రక్షణ కోసం ప్రాణాలర్పించిన పోలీసు అమరవీరుల త్యాగనిరతిని స్మరించుకుంటూ ప్రతి సంవత్సరం అక్టోబర్‌ 21న పోలీసు అమరవీరుల సంస్మరణ దినంగా పాటిస్తున్నామన్నారు. విధి నిర్వహణలో భాగంగా గతేడాది 264 మంది వీరయోధులు మృతిచెందారన్నారు. లా అండ్ ఆర్డర్ నియంత్రణలో గతంలో గద్వాల జిల్లాలోనూ విధినిర్వహణలో పోలీసులు అనేకమంది వీర యోధులుగా మృతి చెందారన్నారు. సమాజం కోసం, భవిష్యత్తు తరాల కోసం, ప్రజా రక్షణ కోసం పోలీసులు అహర్నిశలు తమ ప్రాణాలను లెక్కచేయకుండా విధులు నిర్వహిస్తున్నారని కొనియాడారు. ప్రజాశ్రేయస్సు, శాంతి భద్రతలే లక్ష్యంగా ముందుకు వెళుతున్నామన్నారు. ఎవరికి ఏ సమస్య వచ్చినా పోలీసులు తమ ప్రాణాలను ఒడ్డి విధులు నిర్వహిస్తున్నారని, పోలీసులకు ప్రజల సహకారం చాలా అవసరమని అన్నారు. జిల్లాలోని పోలీసులు అండగా ఉంటూ అనేక రకాలుగా వారిని ఆదుకుంటామన్నారు. పోలీసులు పడుతున్న కష్టాన్ని శ్రమను గుర్తిస్తే వారికి అదే సంతోషం ఇస్తుందన్నారు. దేశ వ్యాప్తంగా విధి నిర్వహణలో వీరమరణం పొందిన 264 మంది పోలీసుల పేర్లను అడిషనల్ ఎస్పీ రాములు నాయక్  చదివి వినిపించారు. అందరికి శ్రద్ధాంజలి ఘటిస్తూ, నివాళులర్పించి 2 నిమిషాల పాటు మౌనం పాటించారు. అమరులైన పోలీసు కుటుంబ సభ్యులకు శాలువాతో సత్కరించి, వారి సమస్యలను విన్నారు. సమస్యలు పరిష్కరిస్తామని హామీ ఇచ్చారు. ఈ కార్యక్రమం లో డిఎస్పీ రంగస్వామి,పలువురు సిఐలు చంద్రశేఖర్, శివ శంకర్ గౌడ్, రాములు నాయక్,ఆర్‌ఐలు, పోలీసు అధికారుల సంఘం నాయకులు పోలీసు కుటుం సభ్యులు తదితరులు పాల్గొన్నారు.