మెల్ బోర్న్: భారత్ తో మ్యాచ్ లో ఆస్ట్రేలియా విజయానికి చేరువవుతున్న దశలో వెంటవెంటనే రెండు వికెట్లు కోల్పోయింది. ఫించ్ (97) సెంచరీ, స్మిత్ (47) హాఫ్ సెంచరీ చేజార్చుకున్నారు. షమీ.. స్మిత్ ను, ఉమేష్ యాదవ్.. ఫించ్ ను అవుట్ చేశారు. స్మిత్.. అశ్విన్ కు, ఫించ్.. ధోనీకి దొరికిపోయారు. ముక్కోణపు సిరీస్ లో భాగంగా ఆదివారం జరుగుతున్న మ్యాచ్ లో 268 పరుగుల లక్ష్యంతో బరిలో దిగిన ఆసీస్ 40.1 ఓవర్లలో 4 వికెట్ల నష్టానికి 219 పరుగులు చేసింది.
ఆసీస్ స్కోరు 51 పరుగుల వద్ద తొలి వికెట్ కోల్పోయింది. భారత్ పేసర్ ఉమేష్ యాదవ్.. వార్నర్ ను అవుట్ చేశాడు. వార్నర్.. రైనాకు క్యాచిచ్చాడు. 115 పరుగుల వద్ద అక్షర్ పటేల్.. వాట్సన్ (41)ను బౌల్డ్ చేశాడు.
అంతకుముందు టాస్ గెలిచి బ్యాటింగ్ దిగిన భారత్.. ఓపెనర్ రోహిత్ శర్మ(138) సెంచరీ, రైనా (51) హాఫ్ సెంచరీ చేయడంతో నిర్ణీత ఓవర్లలో ఎనిమిది వికెట్లకు 267 పరుగులు చేసింది. ఆసీస్ బౌలర్ మిచెల్ స్టార్క్ ఆరు వికెట్లు తీసి భారత్ ను కట్టడి చేశాడు.
