ఉప్పల్, మే 12 ( జనం సాక్షి ): ఉప్పల్ నియోజకవర్గం వ్యాప్తంగా హనుమాన్ జయంతి వేడుకలు భక్తి శ్రద్ధల నడుమ అత్యంత వైభవంగా నిర్వహించబడ్డాయి. ఉదయం నుంచే ఆలయాల్లో భక్తుల రద్దీ నెలకొనగా, భజనలు, ప్రత్యేక పూజలు, హనుమాన్ చాలీసా పారాయణాలతో ఆధ్యాత్మిక వాతావరణం అలుముకుంది. కమలనగర్, కుషాయిగూడ, హబ్సిగూడ, ఉప్పల్ పరిసర ప్రాంతాల్లోని ప్రముఖ హనుమాన్ దేవాలయాలు విద్యుత్ దీపాలతో అలంకరించబడగా, భక్తులతో కిక్కిరిసిపోయాయి.హనుమాన్ జయంతి సందర్భంగా ఉప్పల్ ఎమ్మెల్యే బండారి లక్ష్మారెడ్డి కమలనగర్, కుషాయిగూడ ప్రాంతాల్లో నిర్వహించిన వేడుకల్లో పాల్గొన్నారు. భారీ హనుమాన్ టెంపుల్‌తో పాటు స్థానిక శివాలయాన్ని సందర్శించిన ఎమ్మెల్యే ప్రత్యేక పూజలు నిర్వహించి స్వామివారిని దర్శించుకున్నారు. ఆలయ అర్చకులు ఎమ్మెల్యేకు తీర్థప్రసాదాలు అందించి ఆశీర్వచనాలు చేశారు.ఈ సందర్భంగా ఎమ్మెల్యే మాట్లాడుతూ, శ్రీ ఆంజనేయ స్వామి భక్తి, బలం, ధైర్యం, సేవాభావానికి నిదర్శనమని పేర్కొన్నారు. ప్రతి ఒక్కరూ ఆంజనేయస్వామి ఆశీస్సులతో సుఖసంతోషాలతో జీవించాలని ఆకాంక్షించారు. సమాజంలో ఐక్యత, పరస్పర సహకారం, ధార్మిక చైతన్యం పెంపొందించడంలో ఇలాంటి పండుగలు ముఖ్యపాత్ర పోషిస్తాయని అన్నారు. యువత మంచి మార్గంలో నడవాలని, సేవా భావాన్ని అలవరుచుకోవాలని సూచించారు.హనుమాన్ జయంతి సందర్భంగా ఆలయాల్లో నిర్వహించిన అన్నదాన కార్యక్రమాల్లో ఎమ్మెల్యే పాల్గొని భక్తులకు ప్రసాదాలు పంపిణీ చేశారు. మహిళలు, యువకులు, చిన్నారులతో కలిసి కొంతసేపు భక్తి కార్యక్రమాలను వీక్షించారు. ఎమ్మెల్యే రాకతో స్థానిక నాయకులు, కార్యకర్తలు, భక్తులు పెద్ద సంఖ్యలో ఆలయాలకు తరలివచ్చారు.ఇదే సందర్భంగా ఉప్పల్ నియోజకవర్గ కాంగ్రెస్ పార్టీ ఇంచార్జ్ మందముల పరమేశ్వర్ రెడ్డి హబ్సిగూడలోని ఎన్‌జీఆర్‌ఐ అభయ ఆంజనేయ స్వామి దేవాలయాన్ని సందర్శించి ప్రత్యేక పూజల్లో పాల్గొన్నారు. ఆలయ అర్చకుల ఆధ్వర్యంలో నిర్వహించిన ప్రత్యేక అర్చనలు, హారతుల్లో పాల్గొని స్వామివారి ఆశీస్సులు పొందారు. ఉప్పల్ నియోజకవర్గ ప్రజలందరూ ఆయురారోగ్యాలతో, సుఖసంతోషాలతో ఉండాలని ఆంజనేయస్వామిని ప్రార్థించినట్లు తెలిపారు.ఈ సందర్భంగా పరమేశ్వర్ రెడ్డి మాట్లాడుతూ, హనుమాన్ జయంతి కేవలం ఆధ్యాత్మిక వేడుక మాత్రమే కాకుండా ధైర్యం, క్రమశిక్షణ, సేవాభావాన్ని గుర్తు చేసే పర్వదినమని అన్నారు. యువతలో భక్తి భావం పెంపొందాలని, సమాజంలో శాంతి, సౌభ్రాతృత్వం నెలకొనాలని ఆకాంక్షించారు. ప్రజలంతా కలిసి పండుగలను జరుపుకోవడం ద్వారా సామాజిక ఐక్యత మరింత బలపడుతుందని పేర్కొన్నారు.ఈ కార్యక్రమంలో దేవాలయ ఈఓ వెంకన్న, దేవాలయ కమిటీ సభ్యులు బికుమల్ల అంజయ్య గుప్తా, ఈగ అంజనేయులు, తుమ్మల దేవిరెడ్డి, బుసం రఘునాథ్ రెడ్డి, వర్కాల మదన్ గౌడ్, కడప నర్సింగ్, కిషన్ నాయక్, సంతోష్ కుమార్, రవి శర్మ తదితరులు పాల్గొన్నారు. కాంగ్రెస్ నాయకులు కంది శ్రవణ్ రెడ్డి, రాజన్న, మాలు నాయక్‌తో పాటు స్థానిక నాయకులు, కార్యకర్తలు, భక్తులు పెద్ద సంఖ్యలో హాజరయ్యారు.అలాగే బీఆర్ఎస్ పార్టీ నాయకులు, కార్యకర్తలు కూడా ఎమ్మెల్యేతో కలిసి పూజా కార్యక్రమాల్లో పాల్గొన్నారు. వివిధ ఆలయాల్లో భజన మండళ్లు నిర్వహించిన ఆధ్యాత్మిక కార్యక్రమాలు భక్తులను ఆకట్టుకున్నాయి. కొందరు భక్తులు హనుమాన్ దీక్షలతో ప్రత్యేక దర్శనాలు చేసుకోగా, పలుచోట్ల అన్నదాన కార్యక్రమాలు నిర్వహించారు.ఉప్పల్ నియోజకవర్గంలోని పలు దేవాలయాల్లో రోజంతా భక్తుల రద్దీ కొనసాగింది. చిన్నారుల నుంచి వృద్ధుల వరకు పెద్ద సంఖ్యలో భక్తులు ఆలయాలకు చేరుకుని స్వామివారిని దర్శించుకున్నారు. హనుమాన్ జయంతి వేడుకలతో ఉప్పల్ ప్రాంతం మొత్తం ఆధ్యాత్మిక శోభను సంతరించుకుంది. ప్రజాప్రతినిధులు, రాజకీయ నాయకులు, సామాజిక ప్రముఖులు పాల్గొనడంతో వేడుకలు మరింత ప్రత్యేకతను సంతరించుకున్నాయి.