ఉల్లిపాయ బాంబుల విస్ఫోటన ఘటనతో ఉలిక్కిపడ్డ ఏలూరుఏలూరు నేర వార్తలు, న్యూస్‌టుడేసంఘటన స్థలం వద్ద గుమికూడిన జనంఏలూరులో ఉల్లిపాయ బాంబుల విస్ఫోటనం తర్వాత అక్కడి పరిస్థితి భయానకంగా తయారైంది.ద్విచక్ర వాహనం నడుపుతున్న సుధాకర్, వెనుక కూర్చున్న సాయిరామ్‌ పేలుడు సంభవించగానే ఎగిరి రోడ్డుపై పడ్డారు. సుధాకర్‌ మొండెం నుంచి రెండు కాళ్లూ వేరై ఒక కాలు రెండంతస్తుల డాబా పైనా, మరో కాలు రోడ్డు పక్కన గోడ అవతల పడింది. సాయిరామ్‌ తీవ్రగాయాలతో పడి ఉన్నాడు. ద్విచక్ర వాహనం పూర్తిగా దగ్ధమైంది. ఒక్కసారిగా పెద్ద శబ్దం.. దట్టంగా పొగ కమ్ముకుంది. అప్పటివరకు కూడలిలో ఉన్నవారు హాహాకారాలు చేస్తూ భయంతో తలో దిక్కుకు పరుగులు తీశారు. తొలుత ఎవరో బాంబులతో దాడి చేశారని.. ఓ వ్యక్తి ముక్కలు ముక్కలయ్యాడని ప్రచారం జరిగింది. తరువాత ఉల్లిపాయ బాంబుల విస్ఫోటన ఘటన గురించి తెలిసింది.బాంబు విస్ఫోటనం ఘటన నేపథ్యంలో పోలీసులు ఉలిక్కిపడ్డారు. తొలుత బాంబు దాడి ప్రచారంతో ఆ దిశగా అప్రమత్తమయ్యారు. తర్వాత దీపావళి బాంబులని తెలుసుకున్నారు. సమాచారం అందుకున్న వెంటనే ఏలూరు డీఎస్పీ శ్రావణ్‌ కుమార్, వన్‌టౌన్‌ సీఐ సత్యనారాయణ, సిబ్బంది ఘటనా స్థలానికి చేరుకున్నారు. క్షతగాత్రులను సర్వజన ఆసుపత్రికి, సుధాకర్‌ మృతదేహాన్ని మార్చురీకి తరలించారు. పేలుడు సంభవించినప్పుడు ఆ ప్రదేశంలో ఉన్న ఆ పరిసర ప్రాంతాలకు చెందిన పెద్దిరాజు, ఎస్‌కే ఖాదర్, గోపిశెట్టి సురేష్, ఎస్‌.సత్యనారాయణ, శ్రీనివాస్, సతీష్, పఠాన్‌లకు గాయాలయ్యాయి. ప్రస్తుతం వారు సర్వజన ఆసుపత్రిలో చికిత్స పొందుతున్నారు. సాయిరామ్‌ పరిస్థితి విషమంగా ఉండటంతో గుంటూరుకు, పెద్దిరాజుకు తీవ్ర గాయాలు కావడంతో ఆశ్రం ఆసుపత్రికి తరలించగా చికిత్స పొందుతున్నారు. సర్వజన ఆసుపత్రిలో చికిత్స పొందుతున్న క్షతగాత్రులను ఎస్పీ ప్రతాప్‌ శివకిశోర్‌ పరామర్శించారు. ఘటన గురించి తెలుసుకున్నారు. దీనిపై వన్‌టౌన్‌ పోలీసులు కేసు నమోదు చేసి దర్యాప్తు చేపట్టారు.