బ్రిటిష్ డిప్యూటీ హై కమిషన్ ప్రతినిధితో బండారి లక్ష్మారెడ్డి కీలక భేటీ

వీసా సమస్యలు, విదేశీ ఉన్నత విద్య అవకాశాలపై సుదీర్ఘ చర్చ – ఉప్పల్ విద్యార్థులకు అన్ని విధాలా సహకారం అందించేందుకు కృషి

ఉప్పల్, జూలై 15 (జనం సాక్షి): విదేశాల్లో ఉన్నత విద్యను అభ్యసించాలనే లక్ష్యంతో ముందుకు సాగుతున్న ఉప్పల్ నియోజకవర్గ విద్యార్థులకు అండగా నిలుస్తూ ఉప్పల్ ఎమ్మెల్యే బండారి లక్ష్మారెడ్డి మరో కీలక అడుగు వేశారు. విద్యార్థులు వీసా ప్రక్రియలో ఎదుర్కొంటున్న ఇబ్బందులు, విదేశీ విశ్వవిద్యాలయాల్లో ప్రవేశాల సమయంలో ఎదురయ్యే సమస్యలు, భవిష్యత్తులో వారికి మరింత మెరుగైన సహకారం అందించే అంశాలపై బ్రిటిష్ డిప్యూటీ హై కమిషన్ ప్రతినిధి నళిని రఘు రామన్‌తో విస్తృతంగా చర్చించారు. హైదరాబాద్‌లోని బంజారాహిల్స్ రోడ్ నెం.1లో ఉన్న తాజ్ డెక్కన్ హోటల్‌లో జరిగిన ఈ సమావేశంలో విదేశీ విద్యకు సంబంధించిన పలు కీలక అంశాలు చర్చకు వచ్చాయి. ముఖ్యంగా బ్రిటన్‌లో ఉన్నత విద్య అభ్యసించాలనుకునే విద్యార్థులకు వీసా దరఖాస్తు ప్రక్రియను మరింత సులభతరం చేయడం, అవసరమైన మార్గదర్శకత్వం కల్పించడం, విద్యార్థులకు సరైన సమాచారం అందించడం, విద్యా అవకాశాలను విస్తరించడం వంటి అంశాలపై అభిప్రాయాలు పంచుకున్నారు. ఈ సందర్భంగా ఎమ్మెల్యే బండారి లక్ష్మారెడ్డి మాట్లాడుతూ, “ఉప్పల్ విద్యార్థులకు విదేశీ విద్యలో అండగా నిలవడం నా బాధ్యత. ఆర్థిక, సాంకేతిక లేదా పరిపాలనా కారణాలతో ఏ విద్యార్థి తన కలలను కోల్పోకూడదు. ప్రతిభ కలిగిన ప్రతి విద్యార్థికి అవసరమైన సమాచారం, మార్గదర్శకత్వం, సహాయ సహకారాలు అందేలా నిరంతరం కృషి చేస్తాను” అని పేర్కొన్నారు. ఉన్నత విద్య కోసం విదేశాలకు వెళ్లే విద్యార్థులు ఎదుర్కొంటున్న వీసా జాప్యాలు, పత్రాల ధృవీకరణ, అడ్మిషన్ ప్రక్రియలో తలెత్తే సమస్యలపై ప్రత్యేక దృష్టి సారించాలని బ్రిటిష్ డిప్యూటీ హై కమిషన్ ప్రతినిధిని ఎమ్మెల్యే కోరారు. అలాగే భవిష్యత్తులో అవగాహన కార్యక్రమాలు, విద్యార్థుల కోసం ప్రత్యేక సమాచార సదస్సులు నిర్వహించే అవకాశాలపైనా చర్చించినట్లు తెలిపారు. విద్యార్థుల భవిష్యత్తు అభివృద్ధే లక్ష్యంగా సంబంధిత అధికారులతో సమన్వయం కొనసాగిస్తూ, అవసరమైన ప్రతి విషయంలో తన కార్యాలయం ద్వారా సహకారం అందిస్తామని ఎమ్మెల్యే స్పష్టం చేశారు. ఉప్పల్ నియోజకవర్గ యువత ప్రపంచస్థాయి విద్యా అవకాశాలను సద్వినియోగం చేసుకుని అంతర్జాతీయ స్థాయిలో రాణించాలని ఆకాంక్షించారు. ఈ సమావేశంలో గంధం నాగేశ్వరరావు, జెట్టా కిషోర్, శ్రీనివాస్ రెడ్డి తదితరులు పాల్గొన్నారు.