న్యూఢిల్లీ :  శరీరంలో ఒక్క గాయం కూడా లేదు. వ్రయాణిస్తున్న కారుకు పెద్దగా ప్రమాదం జరగలేదు. అయినా ఇటీవలే కేంద్ర మంత్రివర్గంలో చేరిన గోపీనాథ్ ముండే ప్రమాదం జరిగిన కాస్సేపటికే కన్నుమూసిన ఘటన దేశానికి షాక్ కలిగించింది. ప్రమాద ప్రభావం వల్ల కలిగిన షాక్ కారణంగానే ఆయన మృతి చెందారని ఎయిమ్స్ వైద్యులు ప్రకటించడంతో భారతీయ జనతాపార్టీ వర్గాలు, కేంద్ర మంత్రి వర్గ సభ్యులు తీవ్ర విచారంలో మునిగిపోయారు.

దేశరాజధాని నడిబొడ్డులోని పృథ్వీరాజ్ రోడ్- తుగ్లక్ రోడ్ మలుపులో మంగళవారం ఉదయం గం.6.30 లకు కేంద్ర గ్రామీణాభివృద్ధి శాఖ మంత్రి గోపీనాథ్ ముండే  ప్రయాణిస్తున్న కారు మరొక కారును ఢీకొన్నదని కేంద్ర మంత్రి నితిన్ గడ్కరీ తెలిపారు. తక్షణం ఆయనను ఎయిమ్స్ ఆసుపత్రికి తీసుకెళ్లగా గం.7.50ల సమయంలో ఆయన మరణించారని వైద్యులు ప్రకటించారు. ముండేకు ఎలాంటి గాయాలు తగల్లేదని కాని ఆ ప్రమాద వ్రభావంతో షాక్‌కు గురై ఆయన మృతి చెంది ఉండవచ్చని వైద్యులు నిర్ధారించారు. ఢిల్లీనుంచి ముంబయ్ వెళ్లడానికి బయలు దేరిన మంత్రి మార్గమధ్యంలోనే అనుకోని ప్రమాదంలో చిక్కుకుని కన్నుమూశారు.