పినపాక నియోజకవర్గం సెప్టెంబర్ 24 (జనం సాక్షి): మణుగూరు పట్టణంలో అంబేద్కర్ సెంటర్లో బస్సు షెల్టర్ లేక ప్రయాణికులు తీవ్ర ఇబ్బందులు ఎదుర్కొంటున్నారు. పట్టణ అభివృద్ధి కోసం గతంలో ఉన్న బస్ షెల్టర్ తొలగించి నూతన బస్సు షెల్టర్ ఇప్పటివరకు ఏర్పాటు చేయకపోవడంతో ప్రయాణికులు ఎండకు, వానకు, చలికి ఎలాంటి నీడ లేకపోవడంతో ఇబ్బందులు పడుతున్నారు. ప్రయాణికుల భద్రత కోసం టెంట్ ను కూడా ఏర్పాటు చేయలేదు. ఈ బస్ స్టాప్ నుంచి రోజు భద్రాచలం విజయవాడ ఖమ్మం హైదరాబాద్ కు వందలాదిమంది ప్రయాణికులు ఎక్కే చోట బస్సు షెల్టర్ లేకపోవడంతో ప్రయాణికులు అవస్థలు పడుతున్నారు. చాలా రోజులుగా ప్రతిపాదనలు ఉన్న ఇంతవరకు సాధ్యపడలేదు స్థానిక స్వచ్ఛంద సంస్థల ఆధ్వర్యంలో నిర్మాణం చేపడతామని వాగ్దానాలు చేసినా కార్యరూపం దాల్చడం లేదు. మున్సిపాలిటీ అధికారులు కూడా ముందుకు రాకపోవడంతో ఆర్టీసీ ప్రయాణికులకు తిప్పలు తప్పడం లేదు.