అశ్వరావుపేటలో ఇద్దరు దొంగల్ని పట్టుకున్న పోలీసులు
– రు. ఒక లక్ష 46 వేలు విలువ కలిగిన సొత్తు స్వాధీనం
అశ్వారావుపేట సెప్టెంబర్ 27( జనం సాక్షి) నియోజకవర్గ వ్యాప్తంగా వరుస దొంగతనాలతో ప్రజలు భయభ్రాంతులకు గురవుతున్న తరుణంలో అశ్వరావుపేట పోలీసులు నిఘా లో దూకుడు పెంచారు. మంగళవారం అశ్వరావుపేట సీఐ బొమ్మేర బాలకృష్ణ తన కార్యాలయంలో విలేకరుల సమావేశం ఏర్పాటు చేశారు.పట్టణంలోని బస్టాండ్ ఏరియాలో ఎస్సై బి.సాయి కిషోర్ రెడ్డి తన సిబ్బందితో పెట్రోలింగ్ చేస్తున్నప్పుడు పోలీసులకు తారసపడ్డ ఇద్దరు వ్యక్తులను వెంబడించి అదుపులోకి తీసుకున్నారని సీఐ బాలకృష్ణ తెలిపారు. వాళ్ల సంచులను సోదా చేయగా బంగారు వెండి ఆభరణాలు ఉన్నట్లు తెలిపారు. పశ్చిమగోదావరి జిల్లా ధర్మాజీ గూడెం కు చెందిన చింతలపూడి జస్వంత్, గుంటూరు జిల్లా గుజ్జనగుళ్ళ గ్రామానికి చెందిన బత్తుల వెంకట్రావు అనే ఇద్దరు వ్యక్తులను అదుపులోకి తీసుకున్నామని అన్నారు. వీళ్లు అశ్వరావుపేట గుర్రాల చెరువు పరిసర ప్రాంతాల్లో దొంగతనాలకు పాల్పడి బంగారు వెండి ఆభరణాలను దొంగలించారని సీఐ వెల్లడించారు. బంగారు వెండి ఆభరణాల విలువ అంచనాగా రు. 1,46,000 లు ఉంటుందని తెలిపారు. ఈ కార్యక్రమంలో ఎస్సై లు బి. సాయి కిషోర్ రెడ్డి, చల్లా అరుణ, సిబ్బంది తదితరులు పాల్గొన్నారు.