మునగాల, సెప్టెంబర్ 11(జనంసాక్షి): మునగాల మండలం ఆకుపాముల గ్రామ పరిధిలోని తెలంగాణా గిరిజన గురుకుల బాలికల డిగ్రీ కళాశాలలో గత వారం రోజులుగా తెలంగాణ  రాష్ట్రవ్యాప్తంగా ఏర్పాటు చేసిన స్వచ్చ గురుకుల్ కార్యక్రమంలో భాగంగా ఆదివారం ముగింపు కార్యక్రమంనకు కళాశాల ప్రిన్సిపాల్ నువ్వుల శ్రీలత అధ్యక్షత వహించారు. ఈ సందర్భంగా విద్యార్ధినులచే ప్రతిజ్ఞ చేయించారు. ఈ కార్యక్రమానికి ముఖ్యఅతిథిగా హాజరైన కోదాడ యంయస్ విద్యా సంస్థల చైర్మన్ పందిరి నాగిరెడ్డి మాట్లాడుతూ, విద్యార్ధినులు ఒక లక్ష్యాన్ని ఎంచుకొని క్రమశిక్షణతో, పట్టుదలతో చదివి ఆ లక్ష్యాన్ని సాధించాలని, తల్లిదండ్రులకు, అధ్యాపకులకు మంచి పేరు తేవాలని, కళాశాల ప్రాంగణంను పరిశుభ్రంగా ఉండేలా చూసుకోవాలని కోరారు. మరో అతిధి ఈవిరెడ్డి విద్యా సంస్థల చైర్మన్ ఎస్ఎస్ రావు మాట్లాడుతూ, ప్రతి విద్యార్థి అభివృద్ధికి విద్యయే ఏకైక మార్గమని అన్నారు. ఈ సందర్భంగా కళాశాల విద్యార్ధినులు వేసిన పలు రకాల పెయింటింగ్స్ ను అతిథులు పరిశీలించి హర్షం వ్యక్తం చేశారు. ఈ కార్యక్రమంలో వైస్ ప్రిన్సిపల్ డి.ప్రవల్లిక, అధ్యపకురాండ్రు బి.రమ్య, ఐ. ఫర్హాన, నీరజ, పి సుజాత, నస్రీన్, యం.సునీత, డి.విమల, డి. సాహితి, డి.నూతన, డి.సుజాత మరియు విద్యార్ధినులు పాల్గొన్నారు.