సూర్యాపేట టౌన్ (జనంసాక్షి):స్థానిక వేంకటేశ్వర స్వామి దేవాలయంలో నవరాత్రి ఉత్సవాలలో భాగంగా ఐదవ రోజు శుక్రవారం స్వామి వారు భక్తులకు నిజరూప దర్శనమిచ్చారు.ఆలయ ప్రధాన అర్చకులు నల్లాన్ చక్రవర్తుల వేణుగోపాలాచార్యులు ఆధ్వర్యంలో స్వామివారికి తెల్లవారుజామున పంచామృతాలతో తిరుమంజన స్నపనం నిర్వహించి స్వామి వారిని విశేష వస్త్రాలు, పూలమాలలతో అలంకరణ చేశారు.ఈ సందర్భంగా భక్తులందరూ స్వామివారిని సహస్రనామాలతో, లక్ష్మీ అమ్మవారిని అష్టోత్తర శతనామాలతో కుంకుమార్చనతో పూజించారు.అనంతరం లక్ష్మీ అమ్మవారి వైభవాన్ని వేణుగోపాలాచార్యులు భక్తులకు వివరించారు.పూజానంతరం భక్తులకు తీర్థ ప్రసాదాలు అందజేశారు.ఈ కార్యక్రమంలో ఆలయ కార్య నిర్వహణ అధికారి ఏరువ శ్రీనివాసరెడ్డి , శ్రీహరి ఆచార్యులు, ఫణి కుమారాచార్యులు, ఆండాళ్ గోష్ఠి భక్త బృందం తదితరులు పాల్గొన్నారు.