శేరిలింగంప‌ల్లి, సెప్టెంబర్ 24( జనంసాక్షి): శేరిలింగంపల్లి ప్రాంతంలో విలువలతో కూడిన జర్నలిజానికి ఆద్యుడుగా భావించే సీనియర్ జర్నలిస్టు పివి రాములు ను శుక్రవారం చందానగర్ డివిజన్ మాజీ కార్పొరేటర్ పి. అశోక్ గౌడ్ పరామర్శించారు. ఈ సందర్భంగా రాములు నివాసానికి చేరుకున్న అశోక్ గౌడ్ ఆయన యోగక్షేమాలను అడిగి తెలుసుకున్నారు. ఇందులో భాగంగా అశోక్ గౌడ్ మాట్లాడుతూ పత్రికారంగం గురించి తెలియని రోజుల్లోనే సీనియర్ పాత్రికేయులు పివి రాములు జర్నలిజంలో ప్రవేశించి తన విలువైన వార్తల ద్వారా ఎన్నో విప్లవాత్మక మార్పులకు శ్రీకారం చుట్టిన ఘనత రాములకు దక్కుతుందన్నారు. శేరిలింగంపల్లి ప్రాంతాన్ని బయటి వ్యక్తులు ఇష్టానుసారంగా దోచుకుంటున్న సమయంలో ఎన్నో ఒడిదుడుకులను, ఆటంకాలను సైతం ఎదుర్కొని ప్రజా సంక్షేమం కోసం, సమాజానికి దిశా నిర్దేశం కోసం వ్యక్తిగత జీవితాన్ని సైతం పణంగా పెట్టి శేరిలింగంపల్లి ప్రాంతం అభివృద్ధికోసం వేల కథనాలు వార్తలుగా మలిచి తన ఉనికిని ఘనంగా చాటుకున్న గొప్ప మనసున్న మనిషి జర్నలిస్టు రాములు అని అశోక్ గౌడ్ వివరించారు. జర్నలిస్టు రాములు పది కాలాలపాటు చల్లగా ఉండాలని, రాములును స్ఫూర్తిగా తీసుకొని ఈతరం పాత్రికేయులు, జర్నలిస్టులు సమాజ నిర్మాణం కోసం, సమ సమాజ స్థాపన కోసం విలువలతో కూడిన వార్తా కథనాలను ప్రచురిస్తే బాగుంటుందని అశోక్ గౌడ్ ఆశాభావం వ్యక్తంచేశారు. ఈ సందర్భంగా అప్పటి రోజులని గుర్తుచేసుకున్న రాములు చాలా సందర్భాలలో తాను ఎన్నో ఇబ్బందులను ఎదుర్కొన్నానని, అయినప్పటికీ తన వల్ల నలుగురికి మేలు జరిగినందుకు సంతోషంగా ఉందని అన్నారు.