– స్పీకర్‌కు హైకోర్టు షోకాజ్‌ నోటీసులు జారీ
హైదరాబాద్‌,ఆగస్టు14( జ‌నం సాక్షి ) : హైకోర్టులో తెలంగాణ ప్రభుత్వానికి చుక్కెదురైంది. కోమటిరెడ్డి వెంకటరెడ్డి, సంపత్‌కుమార్‌ల శాసనసభ్యత్వాల అనర్హత వ్యవహారం మరో కీలక మలుపు తిరిగింది. మంగళవారం ఈ కేసుపై విచారణ జరిపిన హైకోర్టు.. అసెంబ్లీ స్పీకర్‌కు నోటీసులు జారీ చేసింది. ఈ వ్యహారంపై ఈ నెల 28లోపు సమాధానం ఇవ్వాలని ఆదేశించింది. ఇటు అసెంబ్లీ కార్యదర్శి, న్యాయశాఖ కార్యదర్శికి నోటీసులు ఇచ్చింది. ఈ నెల 17న కోర్టుకు హాజరు కావాలని సూచించింది. అలాగే కోమటిరెడ్డి వెంకటరెడ్డి, సంపత్‌కుమార్‌ల జీతాలు, అసెంబ్లీ రిజిస్టర్‌ను కూడా సమర్పించాలని కోర్టు సూచించింది. మరోవైపు ఎమ్మెల్యేలకు గన్‌మెన్లను కేటాయించనందుకు డీజీపీతో పాటూ జిల్లా ఎస్పీలపైనా హైకోర్టు ఆగ్రహం వ్యక్తం చేసింది. డీజీపీతో పాటూ గద్వాల, నల్గొండ ఎస్పీలకు నోటీసులు జారీ చేసింది. తదుపరి విచారణను న్యాయస్థానం ఈ నెల 28కి వాయిదా వేసింది. ఫిబ్రవరిలో జరిగిన తెలంగాణ బడ్జెట్‌ సమావేశాల సందర్భంగా.. అసెంబ్లీలో అనుచితంగా ప్రవర్తించారంటూ కోమటిరెడ్డి, సంపత్‌ కుమార్‌ శాసనసభ సభ్యత్వాలు రద్దయ్యాయి. ఈ నిర్ణయాన్ని సవాల్‌ చేస్తూ ఇద్దరు నేతలు హైకోర్టును ఆశ్రయించగా.. ఈ నిర్ణయాన్ని తప్పుబట్టిన కోర్టు.. శానసనభ సభ్యత్వాలను పునరుద్దరించాలని ఏప్రిల్‌లో తీర్పు ఇచ్చింది. కాని సభ్యత్వాలను పునరుద్దరించకపోవడంతో కాంగ్రెస్‌ నేతలు స్పీకర్‌ను కలిసి వినతిపత్రం కూడా అందజేశారు. అయినా స్పందన లేకపోవడంతో మళ్లీ కోర్టు మెట్లెక్కారు. దీనిపై విచారణ జరిపిన కోర్టు నోటీసులు జారీ చేసింది.
————————–
