టేకులపల్లి, సెప్టెంబర్ 8( జనం సాక్షి): ఆర్థిక ఇబ్బందులతో మనస్థాపానికి గురై ఓ రైతు పురుగుమందు సేవించి ఆత్మహత్యకు పాల్పడిన సంఘటన శుక్రవారం వాగొడ్డుతండ లో చోటుచేసుకుంది. కుటుంబ సభ్యుల కథనం ప్రకారం మండల పరిధిలోని గోల్యా తండా గ్రామపంచాయతీలో గల వాగొడ్డుతండ కు చెందిన తేజావత్ హుస్సేన్(36) తన సొంత ఎకరాలు కౌలుకి తీసుకున్న మరో రెండు ఎకరాలలో పత్తి చేను వేశాడు. పత్తి పంట ఆశాజనకంగా లేకపోవడంతో పెట్టిన పెట్టుబడులు తీరవని మానస్థాపానికి చెంది ఇంట్లోనే ఉదయం పురుగుమందు సేవించి మృతి చెందినట్లుగా తెలిపారు. మృతునికి భార్య ఇద్దరు కుమారులు ఉన్నారు. భార్య ఫిర్యాదు మేరకు టేకులపల్లి ఎస్సై కేసు నమోదు చేసి విచారణ చేస్తున్నారు. శవాన్ని పోస్టుమార్టం నిమిత్తం కొత్తగూడెం ప్రభుత్వ వైద్యశాలకు తరలించారు.