– ఎంపీడీఓ డాక్టర్ హరినందన్ రావు
– గురువారం సాయంత్రానికి 1149 అప్లికేషన్స్- రెండు రోజులుగా నాలుగు కౌంటర్ల ద్వారా దరఖాస్తులు స్వీకరణ

మునిపల్లి, ఆగష్టు 10, జనంసాక్షి :గృహలక్ష్మీ పథకానికి భారీ సంఖ్యలో దరఖాస్తులు వచ్చాయని ఎంపీడీఓ డాక్టర్ హరినందన్ రావు అన్నారు. గురువారం సాయంత్రం వరకు 1149 అప్లికేషన్స్ వచ్చినట్లు తెలిపారు. మునిపల్లి మండల కేంద్రంలోని ఎంపీడీఓ కార్యాలయంలో దాదాపు రెండు రోజులు నుంచి నాలుగు కౌంటర్ల ద్వారా దరఖాస్తులను స్వీకరించారు. దాదాపు మండలంలోని అన్ని గ్రామాల నుంచి అప్లికేషన్స్ వచ్చినట్లు పేర్కొన్నారు. గురువారం సాయంత్రం అప్లికేషన్లకు సంబంధించిన డేటా వివరాలను ఉన్నతాధికారులకు పంపించినట్లు తెలిపారు. తదుపరి ప్రక్రియ హయ్యర్ ఆఫీషియల్స్ సూచన ప్రకారం కొనసాగిస్తామని చెప్పారు. అయితే ప్రభుత్వం కేవలం మూడు రోజులు మాత్రమే దరఖాస్తు చేసుకోవడానికి టైం ఇవ్వడంతో లబ్ధిదారులు పెద్ద సంఖ్యలో మండలం కేంద్రంలో క్యూ కట్టారు. మండల ఆఫీస్ పరిసర ప్రాంతాలన్నీ జనంతో కిక్కిరిసి పోయాయి. మరోవైపు కులం, ఆదాయం, నివాసం సర్టిఫికెట్ల కోసం మీసేవ కేంద్రంల దగ్గర లబ్ధిదారులు బారులు తీరారు. గంటల తరబడి లైన్ లలో వేచి ఉన్నారు. ఇంటర్నెట్ సెంటర్స్, జిరాక్స్ షాప్స్ అన్ని లబ్ధిదారులతో నిండిపోయాయి