– హైదరాబాద్‌లో ఘటన
– పోలీసులకు ఫిర్యాదు చేసిన బాధితురాలు
హైదరాబాద్‌, నవంబర్‌19(జనంసాక్షి): భార్యకు ఎత్తు పళ్లున్నాయని పెళ్లయిన మూడు నెలలకే ట్రిపుల్‌ తలాక్‌ చెప్పి ఇంటి నుంచి గెంటేసిన ఘటన మరువకముందే హైదరాబాద్‌లో మరో ఘటన వెలుగుచూసింది. ఆడపిల్ల పుట్టిందన్న ఆక్రోశంతో ఓ ప్రబుద్ధుడు భార్యకు ట్రిపుల్‌ తలాక్‌ చెప్పేశాడు. తనకు న్యాయం చేయాలని బాధితురాలు పోలీసులకు ఫిర్యాదు చేయడంతో ఈ ఘటన వెలుగులోకి వచ్చింది. హైదరాబాద్‌ పాతబస్తీకి చెందిన దస్తగిరి అనే యువకుడికి 2011లో మిరాజ్‌ బేగం అనే మహిళతో వివాహమైంది. పెళ్లి సమయంలో అత్తమామలు అల్లుడికి భారీగానే కట్నకానుకలు ముట్టజెప్పారు. మరుసటి ఏడాదే ఆమె గర్భవతి అయింది. పురిటినొప్పులు వచ్చిన సమయంలో భర్త, అత్తమామలు ఆమెను ఆస్పత్రికి తీసుకెళ్లకుండా ఇంట్లోనే ఉంచడంతో బిడ్డ కడుపులోనే చనిపోయింది. ఆడబిడ్డ కావడంతోనే దస్తగిరి ఆ విధంగా చేశాడని ఆరోపణలు వచ్చాయి. ఈ క్రమంలోనే మిరాజ్‌ మరోసాగి గర్భం దాల్చి కొద్ది నెలల క్రితం పండంటి ఆడబిడ్డకు జన్మనిచ్చింది. ఆడబిడ్డ తనకు వద్దని దస్తగిరి భార్యను పుట్టింట్లో వదిలేసి వెళ్లిపోయాడు. దీనిపై పెద్దల మధ్య ఎన్నిసార్లు పంచాయతీ జరిగినా అతడితీరు మారలేదు. దీనిపై మిరాజ్‌ భరోసా సెంటర్‌ను ఆశ్రయించడంతో ఇద్దరికీ కౌన్సిలింగ్‌ ఇచ్చారు. మూడుసార్లు కౌన్సిలింగ్‌ తర్వాత కూడా దస్తగిరిలో ఎలాంటి మార్పు రాలేదు. భార్యభర్తలను కలిపేందుకు పెద్దలు మరోసారి నిర్వహించిన పంచాయతీలోనే దస్తగిరి భార్యకు మూడుసార్లు తలాక్‌ చెప్పి వెళ్లిపోయాడు. తాను కోరినట్లుగా మగబిడ్డను కని ఇవ్వనందుకే భార్యకు ట్రిపుల్‌ తలాక్‌ ఇస్తున్నట్లు చెప్పాడు. దీంతో అవాక్కయిన మిరాజ్‌ బేగం వెంటనే పోలీసులను ఆశ్రయించింది. దీనిపై సమగ్ర విచారణ చేపట్టి బాధితురాలికి న్యాయం చేస్తామని పోలీసులు తెలిపారు.
