– టీపీసీసీ కార్యదర్శి పటేల్ రమేష్ రెడ్డి

సూర్యాపేట ( జనంసాక్షి ): జాతిపిత మహాత్మా గాంధీ ఆశయాలను నేటి యువత స్ఫూర్తిగా తీసుకోవాలని టిపిసిసి కార్యదర్శి పటేల్ రమేష్ రెడ్డి అన్నారు.ఆదివారం మహాత్మా గాంధీ జయంతి సందర్భంగా జిల్లా కేంద్రంలోని ఎంజీ రోడ్డులో మహాత్మా గాంధీ విగ్రహానికి పూలమాలలు వేసి ఘనంగా నివాళులర్పించారు.అనంతరం ఆయన మాట్లాడుతూ శాంతి, అహింస మార్గాలని ఆచరించి దేశానికి స్వాతంత్రం తెచ్చిన మహోన్నత వ్యక్తి మహాత్మా గాంధీ అని కొనియాడారు.గ్రామాల అభివృద్ధితోనే దేశం అభివృద్ధి చెందుతుందని, గ్రామ స్వరాజ్యమే లక్ష్యమని నమ్మిన వ్యక్తి మహాత్ముడని అన్నారు.గాంధీజీ కన్న కలలను కాంగ్రెస్ పార్టీ కొనసాగిస్తుందని తెలిపారు.బిజెపి, టీఆర్ఎస్ ప్రభుత్వాలు గాంధీజీ చరిత్రను తుడిపి వేసేలా ప్రయత్నాలు చేస్తున్నాయని విమర్శించారు.మహాత్మా గాంధీ జయంతికి ప్రభుత్వ పరంగా వేదిక ఏర్పాటు చేయకపోవడం దారుణమన్నారు.జాతీయ నాయకుల జయంతి, వర్ధంతుల కార్యక్రమాలను ప్రభుత్వాలు అధికారికంగా నిర్వహించేలా చర్యలు తీసుకోవాలన్నారు.మహాత్మా గాంధీ, లాల్ బహుదూర్ శాస్త్రి జయంతి సందర్భంగా శుభాకాంక్షలు తెలియజేశారు.ఈ కార్యక్రమంలో పలువురు నాయకులు పాల్గొన్నారు.