చేర్యాల (జనంసాక్షి) జులై 28 : చేర్యాల మండలం వేచరేణి గ్రామ ముదిరాజు సొసైటీ చైర్మన్ పోలబోయిన అంజనేయులు (42) అకస్మాత్తుగా మృతి చెందారు. గ్రామస్తులు తెలిపిన వివరాల ప్రకారం.. గురువారం ఉదయం చేపల వేటకు వెళ్లి తిరిగి సాయంత్రం ఇంటికి చేరుకోగా తీవ్ర చలి జ్వరం రావడంతో గమనించిన కుటుంబ సభ్యులు చేర్యాల ప్రభుత్వ ఆసుపత్రికి తరలిస్తుండగా మార్గ మధ్యలో మరణించినట్లు తెలిపారు. వారి మృతి పట్ల వేచరేణి గ్రామ సర్పంచ్ ఏనుగుల దుర్గయ్య, ముదిరాజ్ సంఘం గ్రామ శాఖ అధ్యక్షులు శంకర్ లు శుక్రవారం మృతదేహంపై పూల మాల వేసి నివాళులర్పించారు. వారి మరణం బాధాకరమని దిగ్భ్రాంతిని వ్యక్తం చేసి కుటుంబ సభ్యులను ఓదార్చారు. ఈసందర్భంగా వారు మాట్లాడుతూ.. వేచరేణి ముదిరాజు సొసైటీ చైర్మన్ అంజనేయులు ఆత్మకు శాంతి చేకూరాలని భగవంతుడిని ప్రార్థిస్తున్నట్లు తెలిపారు. మత్స కార్మికుడు అంజనేయులు కుటుంబానికి ప్రభుత్వం, మత్స శాఖ తరుపున ఆర్థిక సహాయం అందించాలని వారు కోరారు. మృతినికి భార్య, ఇద్దరు కుమారులు ఉన్నారు.