హైదరాబాద్ : నిమ్స్ వైద్యులు రోడ్డెక్కారు. తమ సమస్యలు పరిష్కరించాలంటూ డిమాండ్ చేశారు. సోమవారం విధులు బహిష్కరించారు. నల్లబ్యాడ్జీలు ధరించి ఆందోళనకు దిగారు. నియామకాలు, పదోన్నతుల్లో ఎయిమ్స్ తరహా నిబంధనలు పాటించాలని డిమాండ్ చేశారు. ఈసందర్భంగా వైద్యులు టెన్ టివితో మాట్లాడారు. ఇందులో నాలుగంచెల వ్యవస్థగా ఉంటుందని, సమూలంగా మార్పు చేయాలంటే ఓ చర్చ జరగాలన్నారు. చిన్న ప్రమోషన్ కోసం దశాబ్దకాలం పాటు వేచి చూడాల్సి వస్తోందన్నారు. ప్రభుత్వాన్ని పక్కదారి పట్టే విధంగా చేస్తున్నారనే అనుమానం కలుగుతోందని పేర్కొన్నారు. నియామకాలు, ప్రమోషన్ల విషయంలో జరుగుతున్న అన్యాయంపై చాలాసార్లు వినతిపత్రాలు ఇవ్వడం జరిగిందన్నారు. తాము 72 గంటల పాటు సమయం ఇవ్వడం జరిగిందని, ఒకవేళ ఆ సమయంలో చేయకపోతే ప్రతి రోజు ఇలాగే ఆందోళనలు నిర్వహించడం జరుగుతుందని పేర్కొన్నారు. భవిష్యత్ కార్యాచరణ ఏ విధంగా ఉండాలో జనరల్ బాడీ మీటింగ్ లో నిర్ణయం తీసుకుంటామని పేర్కొన్నారు.
