హైదరాబాద్ : విద్యుత్ శాఖ అధికారుల నిర్లక్ష్యం ప్రజల ప్రాణాలకు ముప్పుగా మారింది. ట్రాన్స్ ఫార్మర్లు ఏర్పాటు చేసిన ట్రాన్స్ కో వాటికి రక్షణ కల్పించడంలో విఫలమైంది. హైదరాబాద్‌లోని చాలా ప్రాంతాల్లో విద్యుత్ తీగలు యమపాశాల్లా వేలాడుతున్నాయి. వీటి బారిన పడి ఇప్పటికే ఓ బాలుడు మృతిచెందాడు. పలువురికి గాయాలయ్యాయి. అయినా చర్యలు తీసుకోవడంలో నిమ్మకు నీరెత్తినట్టు వ్యవహరిస్తున్న అధికారులు ప్రజల ప్రాణాలతో చెలగాటమాడుతున్నారు.
ఐదేళ్ల బాలుడు మృత్యువాత..
హైదరాబాద్ నగరంలో ఎక్కడ చూసినా రక్షణ లేని ట్రాన్స్‌పార్మర్లే కనిపిస్తున్నాయి. హైవోల్టేజీ ఉన్న వైర్లు నేలకు తాకుతూ ప్రమాదాలను ఆహ్వానిస్తున్నాయి. స్వచ్చభారత్‌ కార్యక్రమం సమయంలో జగద్గరిగుట్టలో స్థానికులు ట్రాన్స్ ఫార్మర్‌కు ఫెన్సింగ్‌ వేయాలని అధికారులను కోరారు. అయితే అధికారులు పట్టించుకోలేదు. రెండు రోజుల క్రితం 5 ఏళ్ల బాలుడు ఆడుకుంటూ ట్రాన్స్ ఫార్మర్‌ సమీపంలోకి వెళ్లి విద్యుత్ షాక్‌కు గురై అక్కడికక్కడే ప్రాణాలు వదిలాడు. ఈ ఘటనతో స్థానికంగా విషాదం నెలకొంది. ఇటువంటి ఘటనలు ఇక్కడే కాదు నగరంలోని పలు ప్రాంతాల్లో చోటుచేసుకుంటున్నాయి. ట్రాన్స్ ఫార్మర్‌ పక్క నుంచి వెళ్లాలంటేనే స్థానికులు భయపడే పరిస్థితులు నెలకొన్నాయి.
ప్రమాదకరంగా 500 ట్రాన్స్ ఫార్మర్లు..
సుమారు 5 వందలకుపైగా ట్రాన్స్ ఫార్మర్లు ప్రమాదకరంగా మారాయి. మరో 3 వందల ట్రాన్స్ ఫార్మర్లు నిత్యం నిప్పురవ్వలు వెదజల్లుతూ ప్రమాదాలను రారమ్మంటున్నాయి. నివాస ప్రాంతాలు, మార్కెట్లు, వాణిజ్య సంస్థలకు సమీపంలోని వీటికి ఎటువంటి రక్షణ లేకుండా ఏర్పాటుచేస్తున్నారు. దీనికి సంబంధించిన వైర్లు నేలను తాకుతున్నాయి. రద్దీ ప్రాంతాలు కావడంతో ఏ క్షణంలోనైనా ప్రమాదం జరిగే అవకాశాలు ఉన్నాయని స్థానికులు ఆందోళన వ్యక్తం చేస్తున్నారు. హైదరాబాద్‌లో నిత్యం రద్దీగా ఉండే ఖైరతాబాద్‌, సికింద్రాబాద్‌, చాంద్రాయణగుట్ట, రాజేంద్రనగర్‌, మాదాపూర్‌, ముషీరాబాద్‌, అంబర్‌పేట, ఉప్పల్‌, పాతబస్తీలోని పలు ప్రాంతాల్లో రక్షణ లేని ట్రాన్స్ ఫార్మర్ల సంఖ్య అధికంగా ఉంది.
తగులుతున్న షాక్ లు..
నగరంలో కొత్తగా నిర్మించే ట్రాన్స్ ఫార్మర్ల దిమ్మలను 5 అడుగుల ఎత్తులో నిర్మిస్తున్నారు. రెండు, మూడేళ్ల క్రితం నిర్మించినవి కేవలం రెండు నుంచి మూడు అడుగుల ఎత్తు మాత్రమే ఉన్నాయి. ట్రాన్స్ ఫార్మర్‌ నుంచి విద్యుత్ సరఫరాకు ఏర్పాటుచేసే బాక్సులు సిమ్మెంటు దిమ్మకు బిగుస్తున్నారు. ఈ బాక్సులకు ఉండే మూతలు కేవలం రెండు మూడు నెలలకే పాడైపోతున్నాయి. దీనితో మూత లేకుండా విద్యుత్ వైర్లు ఉన్న బాక్సులు దర్శనమిస్తున్నాయి. హైవోల్టేజీ ఉన్న వైర్లు బయటకు కనిపించడంతో కొద్దిపాటి వర్షం కురిసినా విద్యుత్ షాక్ తగులుతోంది. పొరపాటున ఈ ప్రాంతంలో ఏ విద్యుత్ స్థంభాన్ని పట్టుకున్నా విద్యుత్ షాక్ తలుగుతోంది.
అధికారులు వెంటనే చర్యలు తీసుకుని ట్రాన్స్‌ఫార్మర్లకు రక్షణగా ఫెన్సింగ్‌లు ఏర్పాటుచేయడంతో పాటు శిథిలావస్థకు చేరుకున్న వాటిని తొలగించాలని ప్రజలు కోరుతున్నారు.
