హుజురాబాద్ రూపురేఖలను మార్చి తీర్చిదిద్దుతా

– ఒక్కసారి ఆశీర్వదించి అవకాశం కల్పించండి

– ప్రభుత్వ విప్, ఎమ్మెల్సీ పాడి కౌశిక్ రెడ్డి

హుజురాబాద్(జనంసాక్షి ) :హుజురాబాద్ ప్రజలు ఆశీర్వదించి ఒక్కసారి తనకు ఎమ్మెల్యేగా అవకాశం ఇవ్వాలని ఐదేళ్లలో హుజురాబాద్ రూపు రేఖలను తీర్చిదిద్ది చూపిస్తానని ప్రభుత్వ విప్, ఎమ్మెల్సీ, బీఆర్ఎస్ అభ్యర్థి పాడి కౌశిక్ రెడ్డి హామీ ఇచ్చారు. హుజురాబాద్ పట్టణంలో ప్రభుత్వ ఉన్నత పాఠశాల క్రీడా మైదానంలో రూ. 10 కోట్లతో మినీ స్టేడియం నిర్మాణానికి స్థానిక ప్రజాప్రతినిధులతో కలిసి భూమి పూజ, శంకుస్థాపన చేశారు. అనంతరం కరీంనగర్ రోడ్డులో 25 లక్షలతో స్ట్రాం వాటర్ డ్రయిన్ నిర్మాణానికి, సైదాపూర్ రోడ్డు నుండి వాటర్ ట్యాంక్ లకు వెళ్ళు మార్గమున రూ 50 లక్షలతో HDPE పైప్ లైన్ నిర్మాణానికి భూమి పూజ చేశారు. ఈ సందర్భంగా పాడి కౌశిక్ రెడ్డి మాట్లాడుతూ… ముఖ్యమంత్రి కేసీఆర్ ఆశీస్సులతో ఈ నియోజకవర్గం నుండి పోటీ చేస్తున్న తనను ప్రజలు ఆదరించాలని కోరారు. ముఖ్యమంత్రి కెసిఆర్ సహకారంతో హుజరాబాద్ నియోజకవర్గాన్ని అన్ని విధాల అభివృద్ధి చేసి సిరిసిల్ల, సిద్దిపేట్, కరీంనగర్ తరహాలో తీర్చిదిద్ది చూపిస్తానని అన్నారు. అధికారులు, కాంట్రాక్టర్లు, అభివృద్ధి పనులను త్వరితగతిన పూర్తి చేయాలని ఆదేశించారు. ఈ కార్యక్రమంలో ప్రజా ప్రతినిధులు, వాకర్స్ అసోసియేషన్ ప్రతినిధులు, తదితరులు పాల్గొన్నారు.