హైదరాబాద్: ఉస్మానియా యూనివర్సిటీ స్నాతకోత్సవానికి గవర్నర్‌ నరసింహన్‌ రానున్న సందర్భంలో ఈ నెల 7న ఓయూ బంద్‌కు పీడీఎస్‌యూ పిలుపునిచ్చింది. తెలంగాణకు వ్యతిరేకంగా గవర్నర్‌ అధిష్టానానికి సంకేతాలు పంపుతున్నారని పీడీఎస్‌యూ విద్యార్థులు ఆరోపించారు. ఈ క్రమంలో ఆయన రాకను నిరసిస్తున్నామని తెలిపారు.
బంద్‌పై స్పందించిన ఓయూ వీసీ
ఈనెల 7న ఓయూ బంద్‌కు పీడీఎస్‌యూ పిలుపునివ్వడంతో వీసీ సత్యనారాయణ స్పందించారు. స్నాతకోత్సవానికి వచ్చే అధికారుల భద్రతకు సంబంధించిన విషయమని, ఎవరూ నిరసన కార్యక్రమాలు చేపట్టారాదని కోరారు. స్నాతకోత్సవానికి వచ్చే అధికారుల భద్రతకు సంబంధించి ఇప్పటికే పోలీసులతో మాట్లాడామని వీసీ తెలిపారు.
ఓయూలో భారీ బందోబస్తు
గురువారం జరగనున్న స్నాతకోత్సవం సందర్భంగా పోలీసులు ఓయూలో పటిష్ట బందోబస్తు ఏర్పాటు చేశారు. ఇప్పటికే ఠాగూర్‌ ఆడిటోరియాన్ని పోలీసులు తమ ఆధీనంలోకితీసుకున్నారు. ఎలాంటి అవాంఛనీయ సంఘటనలు చోటు చేసుకోకుండా పోలీసులు జాగ్రత్త తీసుకుంటున్నారు.
