సంగారెడ్డి, నవంబర్ 30 ( జనం సాక్షి)

ఊత్తుత హామీలతో కాలయాపన

కనీస సౌకర్యాల కల్పనలో ప్రభుత్వం నిర్లక్ష్యం

అక్రెడిటేషన్ పాలసీని వెంటనే ప్రకటించి కొత్తకార్డులు జారీ చేయాలి

డిసెంబర్ 3న మహా ధర్నా ను విజయవంతం చేయండి

టీయూడబ్ల్యూజే కార్యవర్గ సభ్యులు మల్లేశం

జర్నలిస్టుల సమస్యలు పరిష్కరించడంలో సమాచార శాఖ పూర్తిగా విఫలమైందని టీయూడబ్ల్యూజే కార్యవర్గ సభ్యులు ఆడెం మల్లేశం అన్నారు. ఆదివారం జిల్లా కేంద్రమైన సంగారెడ్డిలో ఆయన మాట్లాడుతూ…జర్నలిస్టుల సమస్యలను పరిష్కరించడంలో సమాచార శాఖ పూర్తిగా విఫలమైందన్నారు.తెలంగాణ స్టేట్ యూనియన్ ఆఫ్ వర్కింగ్ జర్నలిస్ట్స్ (టీయూడబ్ల్యూజే) ప్రతినిధి బృందాలు గత రెండేళ్ల కాలంలో సమాచార, పౌర సంబంధాల శాఖ మంత్రి పొంగులేటి శ్రీనివాస్ రెడ్డి ని అనేక సార్లు కలిసి జర్నలిస్టుల సమస్యల పరిష్కారం కోసం వినతి పత్రాలు సమర్పించినప్పుడు ఇచ్చిన హామీలు ఉత్తుత్తవిగా మిగిలిపోతున్నాయని అన్నారు.అక్రెడిటేషన్లు జారీ చేయడం, ఆరోగ్య భద్రత కల్పించడం, ఇళ్ల స్థలాలు మంజూరు చేయడం, వంటి కనీస సౌకర్యాలు కల్పనలో ప్రభుత్వం పూర్తిగా విఫలమైందన్నారు. తెలంగాణ ఉద్యమంలో కీలక భూమిక పోషించిన జర్నలిస్టుల జీవితాలు మెరుగు పడలేదన్నారు. ఉమ్మడి రాష్ట్రంలో పొందిన ఆరోగ్య బీమా వంటి సౌకర్యాలు సైతం అందకుండా పోయాయని ఆవేదన వ్యక్తం చేశారు.అధికారంలో ఉన్నా కాంగ్రెస్ ప్రభుత్వం కూడ అదే బాటలో నడుస్తుందన్నారు. అక్రెడిటేషన్ పాలసీని వెంటనే ప్రకటించి కొత్తకార్డులు జారీ చేయాలని,
ఆరోగ్య బీమా పథకాన్ని వెంటనే పునరుద్ధరించాలని,అర్హులైన జర్నలిస్టులందరికీ ఇళ్లస్థలాలు మంజూరు చేయాలని, వృత్తి కమిటీలు వెంటనే ఏర్పాటు చేయాలని, సంక్షోభంలో ఉన్న చిన్న, మధ్యతరగతి పత్రికలను ఆదుకోవాలనే డిమాండ్లతో ఈనెల 3న ఉదయం 10 గంటలకు హైదరాబాద్ లోని మాసబ్ ట్యాంక్ లోని రాష్ట్ర సమాచార శాఖ కమిషనర్ కార్యాలయం వద్ద మహా ధర్నా నిర్వహించాలని టియుడబ్ల్యూజే నిర్ణయించడం జరిగిందని. సంగారెడ్డి జిల్లాలోని జర్నలిస్టులు పెద్ద సంఖ్యలో పాల్గొని మహా ధర్నాను విజయవంతం చేయాలని విజ్ఞప్తి చేశారు.