(జనంసాక్షి) నవంబర్ 30 :సర్పంచ్ ఎన్నికల వేళ కాంగ్రెస్ నాయకులు రెచ్చిపోయారు. బీఆర్ఎస్ బలపరిచిన అభ్యర్థి నామినేషన్ వేయకుండా ఉండాలని ఆమె భర్తను కిడ్నాప్ చేసి రోజంతా ఊర్లుతిప్పుతూ చిత్రహింసలు పెట్టారు. నల్గొండ జిల్లా తిప్పర్తి మండలం ఎల్లమ్మగూడెంలో చోటుచేసుకున్న ఈ ఘటన సంచలనంగా మారింది.

ఊట్కూరు సందీప్ రెడ్డిని సర్పంచ్ అభ్యర్థిగా కాంగ్రెస్ పార్టీ బలపరిచింది. అయితే ఇతనికి నేర చరిత ఉంది. గతంలో సర్పంచ్ భర్త విజయ్ రెడ్డిని హత్య చేసిన కేసులో నిందితుడిగా ఉన్నాడు. ఇప్పుడు కాంగ్రెస్ పార్టీ బలపరచడంతో ఏకగ్రీవంగా సర్పంచ్‌గా ఎన్నికవ్వాలని ప్రత్యర్థులపై బెదిరింపులకు దిగుతున్నాడు. ఈ క్రమంలో బీఆర్ఎస్ పార్టీ బలపరిచిన అభ్యర్థి మామిడి నాగలక్ష్మి నామినేషన్ వేయకుండా అడ్డుకునేందుకు శనివారం ఉదయం ఆమె భర్త యాదగిరిని కాంగ్రెస్ గుండాలు కిడ్నాప్ చేశారు. ఆందోళనకు గురైన ఆమె స్థానిక నేతలతో కలిసి నల్లగొండలో పార్టీ దీక్షా దివస్‌లో ఉన్న ముఖ్యులను కలిసేందుకు వచ్చారు. గ్రామంలో పరిస్థితిని, తన భర్త కిడ్నాప్‌ విషయాన్ని మాజీ ఎమ్మెల్యే కంచర్ల భూపాల్‌రెడ్డికి వివరించింది. వెంటనే కంచర్ల భూపాల్‌రెడ్డి.. మామిడి లక్ష్మితోపాటు జడ్పీ మాజీ చైర్మన్‌ బండా నరేందర్‌రెడ్డి, మాజీ ఎమ్మెల్యేలు రవీంద్రకుమార్‌, నల్లమోతు భాస్కర్‌రావు, పార్టీ నేత దూదిమెట్ల బాలరాజ్‌యాదవ్‌లతో కలిసి నేరుగా గ్రామానికి చేరుకున్నారు. జిల్లా ముఖ్య నేతలు గ్రామంలో ఉండగా స్థానిక నాయకుల సాయంతో లక్ష్మి సర్పంచ్‌ అభ్యర్థిగా, పలువురు వార్డు మెంబర్‌ స్థానాలకు నామినేషన్లను దాఖలు చేశారు. కాంగ్రెస్‌ నాయకుడు ఏకగ్రీవం కోసం ఇతరులెవ్వరూ నామినేషన్‌ వేయకుండా బెదిరిస్తున్నట్టు బీఆర్‌ఎస్‌ నాయకులు ఆరోపించారు. ఇందులో భాగంగానే తన భర్త యాదగిరితోపాటు వార్డు మెంబర్లుగా పోటీ చేయాలనుకుంటున్న బీఆర్‌ఎస్‌ కార్యకర్తలకు కూడా బెదిరింపులకు గురిచేశారని తెలిపారు. అయితే పోలీసులకు సమాచారమిఇచ్చినా శనివారం రాత్రి వరకు యాదగిరి ఆచూకీ లభించలేదు. మాజీ ఎమ్మెల్యే కంచర్ల ఎస్పీ, డీఎస్పీలకు ఫిర్యాదు చేశారు.

ఈ సందర్భంగా కిడ్నాప్‌నకు గురైన యాదగిరి తనను ఎలా చిత్రహింసలు పెట్టారో వివరించారు. తనను కత్తులతో బెదిరించి కిడ్నాప్ చేశారని యాదగిరి తెలిపారు. ఊరికి రాకుండా నామినేషన్ వేయకుండా కార్లు మారుస్తూ ఊర్లు తిప్పారని అన్నారు. గ్లాసులో ఉచ్చ పోసి తాగించారని ఆవేదన వ్యక్తం చేశారు. టార్చర్ పెట్టిండ్రు.. బట్టలు ఊడదీసి చుక్కలు చూపించుండ్రు.. పిడిగుద్దులు గుద్దిండ్రు అని చెప్పారు. నీ భార్య నామినేషన్ వేయకుండా ఆపించు.. లేదంటే నువ్వు సచ్చుడు పక్క అని బెదిరించిండ్రు అని పేర్కొన్నారు. బోళ్ల వెంకట్ రెడ్డి కిడ్నాపర్లతో మాట్లాడాడని చెప్పారు. తిప్పర్తి పోలీస్ స్టేషన్‌కు తనను తీసుకొచ్చాక బెదిరించి కాగితాలపై పోలీసులు బలవంతపు సంతకాలు చేయించారని ఆరోపించారు.