హైదరాబాద్ : తెలంగాణ రాష్ట్ర ప్రభుత్వంపై వామపక్షాలు సమరభేరీ మోగించనున్నాయి. ప్రజా సమస్యలు..రైతుల సమస్యలు పరిష్కరించకపోవడంపై ప్రభుత్వంపై వత్తిడి పెంచేందుకు వామపక్షాలు నిర్ధిష్టమైన కార్యాచరణను ప్రకటించనున్నాయి. ఈ మేరకు బుధవారం ఉదయం ఎంబీ భవన్ లో వామపక్షాలు భేటీ అయ్యాయి. సీపీఎం, సీపీఐ రాష్ట్ర కార్యదర్శులు తమ్మినేని వీరభద్రం, చాడ వెంకట్ రెడ్డి, ఇతర వామపక్ష నేతలు హాజరయ్యారు. సుమారు గంటకు పైగా ఈ సమావేశం కొనసాగుతోంది. రుణమాఫీ విషయంలో వన్ టైం సెటిల్ మెంట్ కోరుతూ అసెంబ్లీలో డిమాండ్ చేసిన ప్రధాన ప్రతిపక్షంతో సహా, ఇతర విపక్ష సభ్యులను సర్కార్ గెంటివేసిన సంగతి తెలిసిందే. దీనిపై స్పష్టమైన హామీనివ్వాలని వామపక్షాలు డిమాండ్ చేస్తున్నాయి. ఈ సమస్యను పరిష్కరించే విధంగా ప్రభుత్వంపై ఎలా వత్తిడి తేవాలన్న దానిపై సమావేశంలో కూలంకషంగా చర్చిస్తున్నారు. కార్మిక సమస్యలు..ఇతర ప్రజా సమస్యలపై ఈ సమావేశంంలో చర్చిస్తున్నారు. వరంగల్ ఎన్ కౌంటర్ విషయంపై ఎలాంటి ఆందోళనలు చేయాలనే దానిపై కూడా చర్చిస్తున్నట్లు సమాచారం. కాసేపట్లో నిర్ధిష్టమైన కార్యాచరణను ప్రకటించనున్నాయి.
