ఇటిక్యాల (జనంసాక్షి) ఆగస్టు 30 : మండల పరిధిలోని బీచుపల్లి పుణ్యక్షేత్రంలో శ్రీ కోదండరామ స్వామి ఆలయంలో బుధవారం మూడవరోజు మంగళ వాయిద్యాల మధ్య పవిత్రోత్సవము, సుప్రభాత సేవ, ప్రబంధ పారాయణం వంటి కార్యక్రమాలు అత్యంత వైభవంగా నిర్వహించినట్లు ఆలయ మేనేజర్ సురేందర్ రాజు తెలిపారు. అలాగే నూతన పవిత్రములతో పాటు గ్రామ ప్రదక్షణ, యాగశాల ఆరాధనలు, పవిత్ర ప్రతిష్ట, మూల మంత్రాది హోమములు, మూలమూర్తులకు అభిషేకాలు, లఘు పూర్ణావతి నివేదన శాత్తుమురై తీర్థ ప్రసాద గోష్టి తదితర కార్యక్రమాలను అర్చకులు నారాయనన్ శిష్య బృందం వారు కన్నుల పండుగగా నిర్వహించారు. ఈ సందర్భంగా మండల కేంద్రంతో పాటు ఆయా గ్రామాల భక్తులు బీచుపల్లి పుణ్యక్షేత్రం చేరుకొని పవిత్ర కృష్ణానదిలో పుణ్య స్నానాలు ఆచరించి శ్రీ కోదండ రామస్వామి ఆలయంలో జరిగే పవిత్రోత్సవ కార్యక్రమాలను తిలకించి తీర్థ ప్రసాదాలు స్వీకరించారు.