కరీంనగర్‌, నవంబర్‌ 5 : హుజూరాబాదులోని మాన్వేరు మోడల్‌ చెరువును రిజర్వాయర్‌గా మార్చాలని గ్రామ కమిటీ సోమవారం సైకిల్‌ యాత్ర చేపట్టింది. ఈ యాత్ర హుజూరాబాదు నుంచి కరీంనగర్‌ వరకు చేపడుతున్నట్లు కమిటీ సభ్యులు తెలిపారు. ఈ చెరువును రిజర్వాయర్‌గా మారిస్తే హుజూరాబాద్‌ మండల రైతులు పంటలు అధికంగా పండించగలుతారని అన్నారు. ఈ మండలంలోని వ్యవసాయ పోలాలకు సరిగా నీరు అందనందునే రైతులు ఇబ్బందులు పడుతున్నారని రిజర్వాయర్‌ ఏర్పాటు చేస్తే నీటిని పంట పొలాలకు సక్రమంగా అందించవచ్చునని, దీంతో పంటలు బాగా పండుతాయని, రైతులకు ఎంతో మేలు కలుగుతుందని వారు అన్నారు. ఈ ప్రాంత రైతుల సమస్యలను ప్రభుత్వం గ్రహించి మాన్వేరు మోడల్‌ చెరువును వెంటనే మార్చాలని కోరారు. దీంతో మండలంలోని మెట్ట భూములకు నీరు అందడంతో వాణిజ్య పంటలు పండుతాయని అన్నారు. వెంటనే చెరువును రిజర్వాయర్‌గా మార్చాలని కమిటీ సభ్యులు డిమాండ్‌ చేశారు.