మెక్సికో సిటీ: మెక్సికో రాజధాని మెక్సికో సిటీలో ఓ మహిళా ప్రయాణికురాలిపై అత్యాచారం చేసి, ఆమె నుంచి డబ్బు దోచుకెళ్లిన ఉబెర్ కారు డ్రైవర్ ను పోలీసులు అరెస్ట్ చేశారు. క్రిమినల్ కోర్టు ఆదేశాలు మేరకు ఆదివారం నిందితుడిని వరోనిల్ నార్టె జైలుకు పంపారు. మే 2న జరిగిన అత్యాచార ఘటన వివరాలిలా ఉన్నాయి.
మెక్సికో సిటీలో రెస్టారెంట్లు, నైట్ క్లబ్ లకు పాపులర్ అయిన కండెసా డెవలప్ మెంట్ లోని ఓ బార్ నుంచి వచ్చిన బాధితురాలు ఉబెర్ కారు డ్రైవర్ ను పిలిచింది. అడ్రెస్ చెప్పి అక్కడకు తీసుకెళ్లాల్సిందిగా చెప్పింది. కాగా మార్గమధ్యంలో డ్రైవర్ కారు ఆపి ఆమెపై లైంగికదాడికి పాల్పడ్డాడు. ఆ తర్వాత ఆమె పర్స్ తీసుకుని కారులోంచి బయటకు తోసివేసి వెళ్లిపోయాడు. బాధితురాలి ఫిర్యాదు మేరకు పోలీసులు కేసు నమోదు చేసి నిందితుడిని గుర్తించారు. నిందితుడిని గుర్తించడానికి బార్ యజమాని, సీసీటీవీ కెమెరా ఫుటేజీలు సాయపడ్డాయి. పోలీసులు కేసును విచారిస్తున్నారు.
