రాజోలి (జనంసాక్షి) : పెద్దధన్వాడ గ్రామంలో పోలీసుల నిర్బంధం కొనసాగుతోంది. ఇథనాల్‌ ఫ్యాక్టరీ విషయంలో ఏ చిన్న అంశంపై కదలికలొస్తున్నప్పటికీ పోలీసులు నిర్బంధిస్తున్నారు. ఆదివారం రోజున బాధిత గ్రామాల రైతులను కలిసేందుకు వెళ్తున్న టిపి జాక్‌ కన్వీనర్‌ కన్నెగంటి రవి, ఉస్మానియా యూనివర్సిటీ ప్రొఫెసర్‌ స్వామిదాసు, కుల అసమానతల నిర్మూలన పోరాట సమితి ఆలిండియా కన్వీనర్‌ బండారి లక్ష్మయ్యలను పోలీసులు అరెస్టు చేశారు. వారిని పెద్దధన్వాడకు వెళ్లకుండా అదుపులోకి తీసుకుని శాంతినగర్‌ పీఎస్‌కు తరలించారు. ఈ సందర్భంగా పెద్దధన్వాడ ఇథనాల్‌ వ్యతిరేక పోరాట కమిటీ తీవ్రంగా స్పందించింది. మూడు రోజుల క్రితం రాజకీయ నాయకులొస్తే పోలీసులు భారీ బందోబస్తు కల్పించారని, ప్రజలను కలిసేందుకు వస్తున్న ప్రజాసంఘాల నాయకులను మాత్రం అరెస్టు చేస్తున్నారని మండిపడిరది. బాధిత ప్రజలను పరామర్శించేందుకు రావడం కూడా తప్పేనా.. ఇదేం న్యాయమంటూ ప్రశ్నించింది. ఇకపై ఇథనాల్‌ వ్యతిరేక పోరాటం ఉధృతమవుతుందని, ఫ్యాక్టరీ రద్దయ్యే వరకు ఉద్యమం ఆగబోదని హెచ్చరించింది.