– పడవ పోటీలకు ముఖ్యఅతిధిగా రావాలని కోరిన సీఎం
హైదరాబాద్‌, నవంబర్‌6(జ‌నంసాక్షి) : స్టైలిష్‌ స్టార్‌ అల్లు అర్జున్‌కు కేరళలో ఎంత క్రేజ్‌ ఉందో తెలిసిందే. కానీ, స్వయంగా ఆ రాష్ట్ర ముఖ్యమంత్రే ఆయన్ని ఆహ్వానించేంత అభిమానం అక్కడ ఉందంటే ఆశ్చర్యం కలగక మానదు. ఇంతకీ బన్నీని ఎందుకు పిలిచారంటే.. ఏటా కేరళలోని అలప్పుజలోని పున్నందా సరస్సులో పడవ పోటీలు నిర్వహిస్తారు. ఈసారి నవంబరు 10న ఈ పోటీలు జరుగుతున్నాయి.
సుమారు 65 ఏళ్ల చరిత్ర కలిగిన ఈ పోటీలను ‘నెహ్రూ ట్రోపీ బోట్‌ రేస్‌’ పేరిట అత్యంత ప్రతిష్టాత్మకంగా
నిర్వహిస్తారు. ఈ పోటీలకు గౌరవ అతిథిగా పాల్గోవాలని కేరళ ముఖ్యమంత్రి పినరయి విజయన్‌ అల్లు అర్జున్‌ను ఆహ్వానించారు. దీంతో బన్నీ అభిమానుల్లో ఆనందానికి అవధుల్లేవు. తమ అభిమాన నటుడుకు కేరళలోనూ క్రేజ్‌ ఉండటం, అక్కడి ప్రతిష్టాత్మక పోటీలకు ఆయన్ను అతిథిగా ఆహ్వానించడాన్ని గొప్పగా భావిస్తున్నారు. అల్లు అభిమానులు బన్నీని ఎంతగా ఇష్టపడతారో.. బన్నీ కూడా వారిని అంతగానే అభిమానిస్తారు. ఇటీవల వరదలతో తీవ్రంగా నష్టపోయిన కేరళకు ఆయన రూ.25 లక్షల విరాళాన్ని సీఎం రిలీఫ్‌ ఫండ్‌కు ఇచ్చారు. అల్లు అర్జున్‌ నటించిన దాదాపు అన్ని చిత్రాలు అక్కడ విడుదలై మంచి విజయం సాధించాయి. దీంతో మన అల్లు.. అక్కడ ‘మల్లు’ అర్జున్‌గా అభిమానులను సంపాదించుకున్నారు.
