పెనమలూరు: కృష్ణాజిల్లా పెనమలూరు మండలం, పెదపులిపాక వద్ద కృష్ణానదిలో మునిగిపోయి, మృతిచెందిన విద్యార్థుల సంఖ్య ఆరుకు పెరిగింది. శుక్రవారం నలుగురు విద్యార్థుల మృతదేహాలను వెలికితీయగా సీఆర్‌పిఎఫ్‌ జవాన్లు శనివారం మరో ఇద్దరి మృతదేహాలను బయటకు తీశారు. నీటి ఉరవడికి ఈ రెండు మృతదేహాలు దిగువకు కొట్టుకుపోయినట్టు భావిస్తున్నారు. నల్లూరి ఏసుపాదం, చేకూరి ఫణీంద్రల మృతదేహాలను సంఘటన స్థలానికి అర కిలోమీటరు దూరంలో చోడవరం వైపున్న నీటిమడుగు నుంచి బయటకు తీసి, శవపరీక్ష కోసం ఆస్పత్రికి తరలించారు. పోలీసులు కేసు నమోదుచేసి దర్యాప్తు చేస్తున్నారు.