టేకులపల్లి, ఆగస్టు 31( జనం సాక్షి ): రాఖీ పండగసందర్భంగా ఇల్లందు,కొత్తగూడెం ప్రధాన రహదారిలోని ముత్యాలంపాడు క్రాస్ రోడ్డు సమీపాన ఆర్టీసీ బస్సు, బైక్ ఢీకొన్న సంఘటనలో బైక్ పై ప్రయాణం చేస్తున్న ఇరువురికి తీవ్ర గాయాలైన సంఘటన గురువారం జరిగింది. దీనికి సంబంధించిన వివరాలు ఇలా ఉన్నాయి. ఇల్లందు కు చెందిన బుగ్గ వాగు దగ్గర సైకిల్ షాప్ లో పనిచేస్తున్నాడు. రాఖీ పండుగ సందర్భంగా మణుగూరు సమీపానగల జగ్గారంలో తన సోదరి చేత రాఖీ కట్టించుకుని 10 సంవత్సరాల గల తన మేనల్లుడ్ని బైక్ పై ఎక్కించుకొని ఇల్లందు కు వెళ్తున్న క్రమంలో ముత్యాలంపాడు క్రాస్ రోడ్ సమీపానగల పెట్రోల్ బంక్ వద్ద ఎదురుగా వస్తున్న ఆర్టీసీ బస్సు ఢీకొట్టడంతో సతీష్ రెడ్డికి కుడికాలు మోకాలు క్రింద నుంచి పూర్తిగా తెగిపోయింది. మేనల్లుడైన యశ్వంత్ రెడ్డికి కాలు విరగడంతో వెంటనే స్థానిక సులానగర్ ప్రాథమిక ఆరోగ్య కేంద్రంలో ప్రధమ చికిత్స అనంతరం కొత్తగూడెం వైద్యశాలకు తరలించారు. సతీష్ రెడ్డికి కాలు తెగిపోవడంతో తీవ్రంగా రకస్రావం కావడం, వాంతులు చేసుకోవడంతో ఆయన పరిస్థితి ఆందోళనకరంగా ఉంది. తన మేనల్లుడు యశ్వంత్ రెడ్డి ఇల్లందు హాస్టల్ లో చదువుతుండడంతో హాస్టల్లో దించడానికి తన బైక్ పై తీసుకొస్తున్నాడు. జరిగిన ప్రమాదంతో తన ఫోన్ ద్వారా కుటుంబ సభ్యులకు సమాచారం అందించారు. టేకులపల్లి పోలీసులు ఆర్టీసీ బస్సు డ్రైవర్ ని అదుపులోకి తీసుకొని కేసు నమోదు చేసి దర్యాప్తు చేస్తున్నారు.