బాబ్లీ కేసులో చంద్రబాబుకు నోటీసులు
– అరెస్ట్ వారెంట్ జారీ
– 21న ధర్మాబాద్ కోర్టుకు హాజరు కావాలని నోటీసుల్లో వెల్లడి
– చంద్రబాబు సహా 15మందికి నోటీసులు
– 144 సెక్షన్ ను పట్టించుకోలేదని, నిబంధనలను అతిక్రమించారని ఆరోపణలు
– మండిపడుతున్న తెదేపా నేతలు
– ఇది రాజకీయ కుట్రలో భాగమేనంటూ ఆగ్రహం
అమరావతి, సెప్టెంబర్14(జనంసాక్షి) : బాబ్లీ కేసు తెరపైకి వచ్చింది. ఈ కేసులో భాగంగా మహారాష్ట్రలోని ధర్మాబాద్ కోర్టు నుంచి ఏపీ సీఎం చంద్రబాబుకు నోటీసులు జారీ అయ్యాయి. 2010నాటి ఈ కేసులో బాబుతో సహా 16మందికి నోటీసులు పంపగా.. అరెస్ట్ వారెంట్ కూడా వచ్చింది. ఈ నెల 21న ధర్మాబాద్ కోర్టుకు హాజరు కావాలని నోటీసుల్లో పేర్కొన్నారు. నోటీసులు జారీ చేసినవారిలో తెలంగాణ, ఏపీకి చెందిన నేతలు ఉన్నారు. వీరిలో కొందరు నేతలు వేరే పార్టీల్లో కూడా ఉన్నారు. నోటీసులు అందిన వారిలో నారా చంద్రబాబు నాయుడు, దేవినేని ఉమా మహేశ్వరరావు, టి .ప్రకాష్ గౌడ్, నక్కా ఆనంద బాబు, జి.కమలాకర్, కె.ఎస్.ఎన్.ఎస్.రాజు, సి.హెచ్. ప్రభాకర్, ఎన్.నాగేశ్వర్, జి.రామానాయుడు, సి.హెచ్.విజయరామారావు, ముజఫరుద్దీన్ అన్వరుద్దీన్, హన్మంత్ షిండే, పి.అబ్దుల్ ఖాన్ రసూల్ ఖాన్, ఎస్. సోమోజు, ఏఎస్.రత్నం, పి.సత్యనారాయణ శింభులు ఉన్నారు.
ఎనిమిదేళ్లనాటి కేసు తెరపైకి..
2010లో మహారాష్ట్ర నిర్మించిన బాబ్లీ ప్రాజెక్టు, దానికి అనుబంధంగా ఉన్న ఎత్తపోతల పథకాలకు వ్యతిరేకంగా చంద్రబాబుతో పాటూ అప్పటి టీడీపీ ఎమ్మెల్యేలు ఆందోళనకు దిగారు. ప్రాజెక్టు పరిశీలించేందుకు వెళ్లగా.. సరిహద్దులో మహారాష్ట్రలో పోలీసులు అడ్డుకున్నారు. దీంతో నేతలు అక్కడే రోడ్డుపై బైఠాయించి ధర్నాకు దిగారు. తర్వాత ఉద్రిక్త పరిస్థితులు ఏర్పడటంతో లాఠీఛార్జ్ చేశారు. చంద్రబాబుతో సహా ఎమ్మెల్యేలను అరెస్ట్ చేసి స్థానికంగా ఉన్న ఓ కాలేజీలో ఉంచారు. తర్వాత బలవంతంగా విమానంలో హైదరాబాద్కు పంపారు. ఈ ఘటన తర్వాత విధి నిర్వహరణలో ఉన్న
పోలీసులను అడ్డుకోవడం, అనుమతి లేకుండా వచ్చారని .. 144సెక్షన్ అమలులో ఉన్నా పట్టించుకోలేదంటూ చంద్రబాబుతో పాటూ ఎమ్మెల్యేలపై ధర్మాబాద్లో కేసు నమోదయ్యింది. నాన్ బెయిలబుల్ వారెంట్ కూడా జారీకాగా.. అది పెండింగ్లో ఉంది. ఈ కేసుపై ధర్మాబాద్ కోర్టులో ఓ వ్యక్తి పిటిషన్ దాఖలు చేశాడు. నాన్ బెయిలబుల్ వారెంట్ పెండింగ్లో ఉండటాన్ని ప్రశ్నించాడు. దీంతో ఈ కేసు మళ్లీ తెరపైకి వచ్చింది. ఈ పిటిషన్పై విచారణ జరగ్గా వారెంట్ను ఎందుకు అమలు చేయలేదని కోర్టు పోలీసుల్ని ప్రశ్నించినట్లు మహారాష్ట్ర పత్రికల్లో కథనాలు వచ్చాయి. రెండు మూడు రోజుల్లో నోటీసులు వస్తాయని ప్రచారం జరగ్గా.. గురువారం నాడే నోటీసులు జారీ అయ్యాయి. మరోవైపు ఈ కేసుపై మంత్రి లోకేష్ కూడా స్పందించారు. చంద్రబాబుకు నోటీసులిస్తే ధర్మాబాద్ కోర్టుకు వెళ్తామన్నారు. తెలంగాణ ప్రయోజనాల కోసం బాబ్లీ ప్రాజెక్టుకు వ్యతిరేకంగా అధినేత, ఎమ్మెల్యేలు పోరాడారని అన్నారు. అరెస్టులు జరిగినా వెనక్కి తగ్గలేదన్నారు. బాబు బెయిల్ తిరస్కరించిన విషయాన్ని కూడా లోకేష్ గుర్తు చేశారు
మండిపడుతున్న తెదేపా నేతలు..
ఇదిలా ఉంటే చంద్రబాబుకు అరెస్టు వారెంట్ నోటీసులు జారీ చేయడం పట్ల తెలుగుదేశం శ్రేణులు మండిపడుతున్నారు. సీఎం స్థాయిలోని వ్యక్తికి ముందస్తు నోటీసులు ఇవ్వకుండా అరెస్టు వారెంట్లు జారీ చేయడం ఏమిటని ప్రశ్నించారు. ఇది కేవలం బీజేపీ రాజకీయ కుట్రలో బాగమేనని ఆగ్రహం వ్యక్తం చేస్తున్నారు. బీజేపీని రాష్ట్రంలో పుట్టగతులు లేకుండా చేస్తామని, ప్రజలు తగిన గుణపాఠం చెబుతారని హెచ్చరించారు.
