భారత హాకీ జట్టు స్టార్ గోల్ కీపర్ పీఆర్ శ్రీజేశ్​ జెర్సీ నెం.16ని రిటైర్ చేస్తున్నట్లు ఇండియా హాకీ తాజాగా ప్రకటించింది. జట్టుకు శ్రీజేశ్ అందించిన సేవలకుగాను హాకీ ఇండియా ఈ నిర్ణయం తీసుకుంది. ఇకపై పురుషుల సీనియర్ టీమ్​లో ఈ నెంబర్ జెర్సీని మరొకరికి కేటాయించరు. కానీ, జూనియర్ హాకీ జట్టులో మాత్రం యాథావిధిగా నెం. 16 జెర్సీ ఉండనుంది. ఈ మేరకు హాకీ ఇండియా జనరల్ సెక్రటరీ భోళా నాథ్ సింగ్ బుధవారం ఓ ప్రకటనలో పేర్కొన్నారు.

‘పురుషుల సీనియర్ హాకీ టీమ్ నుంచి శ్రీజేశ్ జెర్సీ నెం.16ను రిటైర్ చేస్తున్నాం. ఇకపై ఈ నెంబర్ జెర్సీ ఇంకెవరికీ ఉండదు. అయితే జూనియర్ హాకీ జట్టులో మాత్రం నెం.16 జెర్సీ కనిపిస్తుంది. ఇక శ్రీజేశ్ ఇప్పుడు జూనియర్ హాకీ టీమ్ కోచ్​గా బాధ్యతలు స్వీకరించనున్నాడు. అతడు మరికొంత మందిని శ్రీజేశ్​గా తీర్చిదిద్దాల్సి ఉంది’ అని నాథ్ సింగ్ అన్నారు.

కాగా, గత రెండు ఒలింపిక్స్ (టోక్యో, పారిస్)​లో టీమ్ఇండియా కాంస్యం సాధించడంలో శ్రీజేశ్ కీలక పాత్ర పోషించాడు. దాదాపు రెండు దశాబ్దాలకుపైగా టీమ్ఇండియాకు ప్రాతినిధ్యం వహించిన శ్రీజేశ్ పారిస్ విశ్వ క్రీడలతోనే తన సుదీర్ఘ కెరీర్​కు గుడ్​బై చెప్పాడు.