– త్వరలో వైసీపీలో చేరేందుకు సిద్ధమవుతున్న తోట నర్సింహారావు
– తన సతీమణికి టికెట్‌ నిరాకరించిన టీడీపీ
– టికెట్‌ ఇచ్చేందుకు సుముఖత వ్యక్తం చేసిన వైసీపీ
కాకినాడ, మార్చి11(జ‌నంసాక్షి) : తూర్పుగోదావరి జిల్లా కాకినాడ ఎంపీ తోట నరసింహం తెలుగుదేశం పార్టీకి గుడ్‌ బై చెప్పనున్నట్లు సమాచారం. అనారోగ్య కారణాలతో తాను వచ్చే ఎన్నికల్లో పోటీ చేయనని ప్రకటించిన తోట నరసింహం తన భార్యకు జగ్గంపేట ఎమ్మెల్యే టిక్కెట్‌ ఇవ్వాలని పార్టీ అధిష్ఠానాన్ని కోరారు. ఈ నేపథ్యంలోనే నరసింహం సతీమణి వాణి, కుమారుడు రామ్‌జీ, ఇతర అనుచరులతో ఆదివారం
అమరావతిలో ముఖ్యమంత్రి చంద్రబాబును కలిసి తనకు టిక్కెట్‌ కేటాయించాల్సిందిగా కోరారు. దీనిపై చంద్రబాబు స్పందిస్తూ.. ముందు నరసింహం ఆరోగ్యం కుదుటపడేలా చూసుకోవాలని, కోలుకున్న తర్వాత ఆయనకు ఎమ్మెల్సీగా అవకాశం ఇస్తామని హావిూ ఇచ్చారు. ఈలోగా పార్టీ అభ్యర్థుల విజయానికి కృషిచేయాలని సూచించారు. దీంతో ఆమె అసంతృప్తిగానే వెనుదిరిగారు. అయితే కొద్దిరోజులుగా వైసీపీ నేతలు తోట ఫ్యామిలీతో టచ్‌లో ఉన్నారు. గతవారం వైసీపీ నేత బొత్స సత్యనారాయణ, నాలుగు రోజుల క్రితం కాకినాడ మాజీ ఎమ్మెల్యే ద్వారంపూడి చంద్రశేఖర్‌రెడ్డి వీరవరం వచ్చి వారితో మాట్లాడి వెళ్లారు. జగ్గంపేట సీటు ఇవ్వలేమని, కాకినాడ సిటీ, పిఠాపురం, పెద్దాపురం ఈ మూడు స్థానాల్లో ఎక్కడి నుంచైనా పోటీచేసేందుకు అవకాశం కల్పిస్తామని వైసీపీ నాయకులు తోట వాణికి భరోసా ఇచ్చినట్లు తెలిసింది.
వైసీపీలో చేరితే కాకినాడ సిటీ నియోజకవర్గం నుంచి పోటీ చేసేందుకు తోట వాణి ఆసక్తి చూపుతున్నట్లు సమాచారం. కాకినాడకు వైఎస్‌ జగన్‌ వస్తుండడంతో తోట వాణి ఆయనతో భేటీ అయ్యే అవకాశం ఉందని అనుచర వర్గాల ద్వారా తెలుస్తోంది. ప్రస్తుతం ఎంపీ తోట నరసింహం విశాఖపట్నంలోని ఓ ప్రైవేటు ఆసుపత్రిలో చికిత్స పొందుతున్నారు. రెండ్రోజుల్లో వారు వైసీపీలో చేరనున్నట్లు సమాచారం.
రాజీనామా బాటలో.. మరో టీడీపీ ఎంపీ?
