టీడీపీ నేత నక్కా ఆనంద్‌ బాబు మండిపాటు

అమరావతి,జూలై16(జనం సాక్షి ): రాష్ట్రంలో జరుగుతున్నఅక్రమ మైనింగ్‌పై వైసీపీ నాయకులు నిసిగ్గుగా మాట్లాడుతున్నారని టీడీపీ నేత నక్కా ఆనంద్‌ బాబు మండిపడ్డారు. వైసీపీ నాయకులు అక్రమ మైనింగ్‌పై సిగ్గు పడాల్సింది పోయి …. నిర్లజ్జగా సమర్దించుకుంటూ మసి పూసి మారేడికాయ చేస్తున్నారని విమర్శిం చారు. మూడేళ్ల వైసీపీ బకాసురుల చేతిలో రాష్ట్రంలోని కొండలు, గుట్టలు అన్నీ కరిగిపోతున్నాయన్నారు.
వైసీపీ మూడేళ్లో చేసిన అభివృద్ది సూన్యమన్నారు. వారి ఎజెండా కేవలం దాచుకో… దోచుకో అనే విధంగా ఉందన్నారు. 175 నియోజకవర్గాలు ఉంటే …. 150 నియోజకవర్గాల్లో యధేచ్చగా వైసీపీ ఎమ్మెల్యేలు, ఇన్‌చార్జ్‌లు దోచుకుంటున్నారని ఆరోపించారు. హైకోర్టు చరిత్రాత్మక కొండలను కాపాడు కోవాలని చెప్పినప్పటికీ , అధికారులు కోర్టుకు తప్పుడు సమాచారం ఇచ్చి తప్పుదోవ పట్టిస్తున్నారని చెప్పారు. వైసీపీ సర్కార్‌ కారణంగా చరిత్రాత్మిక విశాఖపట్నం రిషికొండ కనుమరుగై పోయిందని ఆగ్రహం వ్యక్తం చేశారు. కోర్టులన్నా, ఎన్‌జీటీలన్నా వైసీపీ సర్కార్‌కు లెక్కలేదన్నారు. మన్యం ప్రాంతంలో వై.వి. సుబ్బారెడ్డి బాక్సైట్‌ ద్వారా 15 నుంచి 20 వేల కోట్ల కుంభకోణానికి తెరతీశారని ఆరోపించారు. అక్రమ మైనింగ్‌పై టీడీపీ నిజనిర్దారణ కమిటీ వెళ్లి పరిశీలిస్తే తమ పై కేసులు నమోదు చేస్తున్నారని పేర్కొన్నారు. టీడీపీ హయాంలో ట్రాక్టర్‌ ఇసుక 1000, 1200 రూపాయలకు వస్తే… ఇప్పుడు దాన్ని 7 వేల రూపాయలు చేశారని మండిపడ్డారు. ఇసుక అందుబాటులో లేక 30 లక్షల కుటుంబాలు అర్దాకలితో అలమటిస్తున్నారని ఆవేదన వ్యక్తం చేశారు. ఇసుక మొత్తం జగన్‌ మోహన్‌ రెడ్డే తినేస్తున్నాడని, ఇసుక తింటే ఎవరైనా చస్తారు.. కానీ, ఈయనకు ఎలా అరుగుతుందో అర్ధం కావడం లేదని విమర్శించారు.