వరంగల్ ఈస్ట్, ఆగస్టు 21 (జనం సాక్షి)వరంగల్ తూర్పు నియోజకవర్గం లోని ఉరుసు శ్రీ నాగేంద్ర స్వామి దేవాలయం (నాగమయ్య గుడి) లో సోమవారం నాగుల పంచమి మహోత్సవం వైభవంగా నిర్వహించారు. ఈ సందర్భంగా వరంగల్ నగరంతో పాటు చుట్టుపక్కల ఉన్నటువంటి వివిధ ప్రాంతాలకు చెందిన వేలాది మంది భక్తులు ఉదయం నుంచే నాగేంద్ర స్వామి దర్శించుకుని పుట్టలో పాలు పోసి పసుపు కుంకుమ వేసి పూజలు నిర్వహించారు. తమ మొక్కులు చెల్లించుకున్నారు. ఆలయ ప్రధానార్చకులు శ్రీరామ్ శర్మ, జాగర్లపూడి కోటయ్య శర్మ తో పాటు హరీష్ శర్మ అర్చనలు నిర్వహించారు. ఆలయ ఈవో కమల భక్తులకు అన్ని రకాల ఏర్పాట్లు చేశారు. అదేవిధంగా భక్తులకు ఎలాంటి అసౌకర్యం కలగకుండా స్థానిక పోలీసులు బందోబస్తు నిర్వహించారు.