ప్రముఖ ఫిన్‌టెక్‌ కంపెనీ పేటీఎం) మాతృసంస్థ ‘వన్‌97 కమ్యూనికేషన్స్‌’.. సోలార్‌ సౌండ్‌బాక్స్‌ను లాంచ్‌ చేసింది. భారత్‌లో మొట్టమొదటిసారిగా సౌరశక్తితో నడిచే సౌండ్‌ బాక్స్‌ను తీసుకొచ్చింది. తక్కువ సూర్యకాంతితో ఛార్జ్‌ అయ్యేలా వీటిని రూపొందించినట్లు కంపెనీ తెలిపింది. వ్యాపారులకు విద్యుత్‌ ఖర్చుల్ని తగ్గించేందుకు వీటిని అందుబాటులోకి తెచ్చినట్లు పేటీఎం వెల్లడించింది.పేటీఎం సోలార్‌ సౌండ్‌ బాక్స్‌లు పైభాగంలో సోలార్‌ ప్యానెల్‌ను కలిగిఉంటాయి. ఈ బాక్స్‌ను సూర్యకాంతి తగిలేలా ఉంచితే ఆటోమెటిక్‌గా ఛార్జ్‌ అవుతుంది. డ్యూయల్‌ బ్యాటరీతో దీన్ని తీసుకొచ్చారు. ఇందులో ఒక బ్యాటరీ సౌరశక్తితో ఛార్జ్‌ అయితే, మరొకటి కరెంట్‌తో ఛార్జ్‌ చేయొచ్చు. సౌరశక్తితో 2-3 గంటలు ఛార్జ్‌ చేస్తే రోజు మొత్తం పనిచేస్తుందని కంపెనీ చెబుతోంది. ఇక కరెంట్‌తో ఒక్కసారి ఫుల్‌ ఛార్జ్‌ చేస్తే 10 రోజుల వరకు వస్తుందని తెలిపింది. 4జీ కనెక్టివిటీకి సపోర్ట్‌ చేసే ఈ సౌండ్‌బాక్స్‌ 3W స్పీకర్‌తో వస్తోంది. 11 భాషల్లో ఆడియో నోటిఫికేషన్‌కు సపోర్ట్‌ చేస్తుంది.