అలాంటిఆలోచన లేదన్న అమెరికా

వాషింగ్టన్‌,జనవరి9(జ‌నంసాక్షి ): హెచ్‌-1బీ వీసాదారులకు ఊరట కలిగించేలా ట్రంప్‌ ప్రతిపాదిత నిర్ణయాలను వెనక్కి తీసుకున్నారు. . సుమారు ఏడున్నర లక్షల మంది భారతీయులను అమెరికా నుంచి వెళ్లగొట్టేలా హెచ్‌-1బీ వీసాల పొడిగింపు చేయకూడదన్న తమ నిర్ణయంపై ట్రంప్‌ ప్రభుత్వం వెనక్కి తగ్గింది. వివిధ రంగాల నుంచి ఒత్తిడి రావడం, అమెరికా ఆర్థిక రంగంపై ప్రతికూల ప్రభావం చూపనుందన్న నేపథ్యంలో ఈ నిర్ణయం తీసుకున్నట్లు సమాచారం. అలాంటి ఆలోచనేవిూ తమకు లేదని సోమవారం స్పష్టంచేసింది. గరిష్ఠంగా ఆరేళ్ల పాటు మాత్రమే అనుమతించేలా నిబంధనల్లో మార్పులు తీసుకొస్తున్నారన్న వార్తలు ఆందోళన కలిగించిన విషయం తెలిసిందే. హెచ్‌-1బీ వీసా పరిమితిని ఆరేళ్లకు మించి పొడిగించేలా అనుమతిచ్చే సెక్షన్‌ 104 (సీ)కి మార్పులు చేసి.. ఆ వీసాదారులను అమెరికా విడిచి వెళ్లేలా చేసే ఉద్దేశం మాకు లేదు. ఒకవేళ అలా చేసినా వచ్చిన నష్టం లేదు. ఎందుకంటే సెక్షన్‌ 106(ఎ)-(బీ) కింద ఎంప్లాయర్స్‌ ఏడాది చొప్పున పరిమితిని పెంచుకుంటే వెళ్లే అవకాశం ఉంటుంది అని యూఎస్‌ సిటిజన్‌షిప్‌ అండ్‌ ఇమ్మిగ్రేషన్‌ సర్వీసెస్‌ (యూఎస్‌సీఐఎస్‌) విూడియా రిలేషన్స్‌ చీఫ్‌ జోనాథన్‌ వితింగ్టన్‌ స్పష్టంచేశారు. అధ్యక్షుడు జారీ చేసిన బయ్‌ అమెరికన్‌ హైర్‌ అమెరికన్‌ ఎగ్జిక్యూటివ్‌ ఆర్డర్‌ను అమలు చేసేందుకు కొన్ని విధానపరమైన మార్పులు చేస్తున్నామని ఆయన తెలిపారు. ఇప్పటికే పరిమితి పూర్తయి.. గ్రీన్‌కార్డుల కోసం వేచి చూస్తున్న లక్షలాది మంది ఇండియన్స్‌కు ఇది కచ్చితంగా ఊరట

కలిగించే విషయమే. ఈ ప్రకటనకు ముందే ఇమ్మిగ్రేషన్‌ వాయిస్‌ గ్రూప్‌ తాము విజయం సాధించినట్లు తమ ఫేస్‌బుక్‌ పేజీలో ప్రకటించింది. హెచ్‌-1బీకి సంబంధించి యూఎస్‌సీఐఎస్‌ తమ నిర్ణయాన్ని మార్చుకున్నట్లు ఈ గ్రూప్‌ స్పష్టంచేసింది.