ఉపాధ్యాయ వృత్తి మహోన్నతమైంది

వేములవాడ గ్రామీణం సెప్టెంబర్ 5 (జనంసాక్షి): అన్ని వృత్తులలో కంటే ఉపాధ్యాయ వృత్తి మహోన్నతమైందని అగ్రహారం ప్రభుత్వ డిగ్రీ కళాశాల ప్రిన్సిపాల్ వడ్లూరి శ్రీనివాస్ పేర్కొన్నారు. ఉపాధ్యాయ దినోత్సవాన్ని పురస్కరించుకొని మంగళవారం సర్వేపల్లి రాధాకృష్ణ చిత్రపటానికి పూల మాలలు వేసి ఘనంగా నివాళులు అర్పించారు. ఈ సందర్భంగా ఆయన మాట్లాడుతూ ఉపాధ్యాయులు తమ విద్యార్థుల బంగారు భవిష్యత్తు కోసం అహర్నిశలు శ్రమిస్తూ వారు ఉన్నత స్థాయిలో స్థిరపడేలా కృషి చేస్తారన్నారు. ఉపాధ్యాయులు విద్యార్థుల్లోని అజ్ఞానాన్ని తొలగించడంతోపాటు, వారి జీవితానికి మార్గదర్శకత్వం అందిస్తారని జేఎన్టీయూ కళాశాల ప్రిన్సిపాల్ శ్రీనివాసరావు పేర్కొన్నారు. అనంతరం విద్యార్థులు అధ్యాపకులను శాలువాలతో సత్కరించారు. ఈ కార్యక్రమంలో ఎన్ఎస్ఎస్ ప్రోగ్రాం ఆఫీసర్ రమాదేవి, వెంకటేశ్వర్లు, మధు రాజేష్, అప్సరి ఉస్మాని, నరసయ్య కరుణ, మధుబాబు, దీపిక, అర్జున్, ఫకీర్ బాబా, తదితరులు పాల్గొన్నారు.