“జనం సాక్షినర్సాపూర్, అక్టోబర్ 28 : భారీ వర్షాలు కురుస్తూ వరి ధాన్యం నీటిపాలైతున్నా ప్రభుత్వం, అధికారులకు మాత్రం చీమకుట్టినట్టు కూడా లేకుండా పోతుంది. ధాన్యం కొనుగోలు కేంద్రాలను ప్రారంభించక, ధాన్యాన్ని కొనుగోలు చేయక రైతులను అధోగతి పట్టిస్తున్నారు. కొనుగోలు కేంద్రానికి వారం రోజులు క్రితం వరి ధాన్యం తీసుకువచ్చిన దానిని తూకం వేసి కొనే నాధుడే లేకుండా పోయాడు.

గత రెండు రోజుల క్రితం కురిసిన వర్షానికి వరి ధాన్యం తడిసిపోగా, మళ్లీ సోమవారం రాత్రి కురిసిన భారీ వర్షానికి ధాన్యం మళ్లీ తడవడం జరిగింది. మెదక్ జిల్లా నర్సాపూర్ మండలం కాజీపేట గ్రామంలో పీఏసీఎస్ ఆధ్వర్యంలో ఏర్పాటు చేసిన ధాన్యం కొనుగోలు కేంద్రాన్ని అధికారులు, సిబ్బంది ఇప్పటికీ ప్రారంభించకపోవడం శోచనీయం. ఈ నెల 27వ తేదీన పీఏసీఎస్ ఆధ్వర్యంలో ధాన్యం కొనుగోలు కేంద్రాలను ప్రారంభిస్తామని పీఏసీఎస్ చైర్మన్ రాజు యాదవ్ ప్రకటించినప్పటికీ ధాన్యం కొనుగోలు కేంద్రం ప్రారంభించకపోవడం విచారకరం.

వరి ధాన్యాన్ని ప్రభుత్వం కొనుగోలు చేస్తుందని రైతులు కోసిన ధాన్యాన్ని కేంద్రానికి తీసుకురావడం జరిగింది. కేంద్రానికి తీసుకువచ్చి వారం రోజులు గడుస్తున్నా అధికారులు, సిబ్బంది కొనుగోలు చేయడమే కాదు కనీసం తూకాలను కూడా ఏర్పాటు చేయలేదు. అకాల వర్షాలను దృష్టిలో పెట్టుకుని కనీసం టార్పాలిన్లను పంపిణీ చేయడంలో కూడా విఫలమయ్యారు. సోమవారం రాత్రి కురిసిన భారీ వర్షానికి రైతులు తీసుకువచ్చిన వారి ధాన్యం పూర్తిగా నీటిపాలైంది. ఇప్పటికైనా అధికారులు, ప్రభుత్వం స్పందించి కొనుగోలు ప్రక్రియ ప్రారంభించాలని రైతులు కోరుతున్నారు.

వారం రోజులైనా వడ్లు కొంటలేరు : బేగంపేట్ నరేష్

పీఏసీఎస్ కేంద్రానికి వడ్లను తీసుకువచ్చి వారం రోజులు గడుస్తున్నా తూకం వేయడం లేదు. కనీసం టార్పాలిన్లను కూడా ఇవ్వడం లేదు. గత రెండు రోజుల క్రితం వరి ధాన్యం తడిసిపోయిందని, దానిని ఆరబెట్టగా సోమవారం రాత్రి కురిసిన వర్షానికి మళ్లీ తడిసింది. ఒక లారీ లోడ్ వరి ధాన్యాన్ని కేంద్రానికి తీసుకువచ్చాను. కాంట పెట్టడానికి ఏ ఒక్కరు కూడా అందుబాటులో లేరు. తూకం వేయడానికి హమాలీలు ఇంకా రాలేదు, ఇప్పటికైనా కేంద్రాన్ని ప్రారంభించి వడ్లను కొనుగోలు చేయాలి.