నేడు స్నపన తిరుమంజనం

తిరుమల,ఆగస్ట్‌14(జ‌నం సాక్షి): శ్రీవారి ఆలయ అష్టబంధన బాలాలయ మహాసంప్రోక్షణంలో భాగంగా మంగళవారం ఆగమోక్తంగా అష్టబంధన సమర్పణ జరిగింది. ఉదయం 5.30 గంటల నుంచి 9 గంటల వరకు ఈ కార్యక్రమాన్ని చేపట్టారు. తిరిగి రాత్రి 7 గంటల నుంచి రాత్రి 10 గంటల వరకు యాగశాలలో వైదిక కార్యక్రమాలు జరుగనున్నాయి. గర్భాలయంలోని శ్రీవారి మూలమూర్తితోపాటు ఉప ఆలయాలైన శ్రీ గరుడాళ్వార్‌, పోటు తాయార్లు, శ్రీవరదరాజస్వామి, శ్రీ యోగ నరసింహస్వామి, శ్రీ విష్వక్సేన, శ్రీ భాష్యకార్లు, శ్రీవేణుగోపాలస్వామి, శ్రీ బేడి ఆంజనేయస్వామివారి విగ్రహాలకు అష్టబంధన సమర్పణ జరిగింది. ఈ అష్టబంధనాన్ని పద్మపీఠంపై స్వామివారి పాదాల కింద, చుట్టుపక్కలా తూర్పు, ఆగ్నేయం, దక్షిణం, నైఋతి, పశ్చిమం, వాయువ్యం, ఉత్తరం, ఈశాన్య దిక్కుల్లో సమర్పించారు. ఆలయంలో జరుగుతున్న ఆనంద నిలయ విమానం, ధ్వజస్తంభం శుద్ధి పనులను మంగళవారం టిటిడి ఈవో అనిల్‌కుమార్‌ సింఘాల్‌, జెఈవో కె.ఎస్‌.శ్రీనివాసరాజు కలిసి పరిశీలించారు. ఈ సందర్భంగా ధ్వజస్తంభ శిఖరానికి అలంకరించేందుకు రూ.1.5 లక్షలు విలువైన 11 నూతన బంగారు రావి ఆకులను, పీఠానికి, స్తంభానికి మధ్య ఉంచేందుకు రూ.4 లక్షలు విలువైన బంగారు చట్రాన్ని, విమాన వేంకటేశ్వరస్వామివారికి అలంకరించేందుకు రూ.1.75 లక్షలు విలువైన వెండి మకర తోరణాన్ని టిటిడి సిద్ధం చేసింది. వీటి ఏర్పాటు పనులను ఈవో, జెఈవో పరిశీలించారు. అష్టబంధన బాలాలయ మహాసంప్రోక్షణంలో భాగంగా బుధవారం ఉదయం శ్రీవారి మూలవర్లకు, పరివార దేవతలకు చతుర్దశ కలశ స్నపనతిరుమంజనం నిర్వహిస్తారు. మధ్యాహ్నం 3 నుంచి రాత్రి 7 గంటల వరకు మహాశాంతి పూర్ణాహుతి, ఆ తరువాత శ్రీవారి మూలవర్లకు, పరివార దేవతలకు మహాశాంతి తిరుమంజనం చేపడతారు. రాత్రి యాగశాల కార్యక్రమాలు నిర్వహిస్తారు. ఈ కార్యక్రమంలో శ్రీవారి ఆలయ ప్రధానార్చకులు శ్రీ వేణుగోపాల దీక్షితులు, ఓఎస్‌డి శ్రీ పాల శేషాద్రి, ఆలయ డెప్యూటీ ఈవో హరీంద్రనాథ్‌, ఇతర అధికారులు పాల్గొన్నారు.