– ఎన్టీఆర్‌ స్ఫూర్తితో పనిచేయాలని పిలుపునిచ్చిన చంద్రబాబు
విజయవాడ, జనవరి18(జ‌నంసాక్షి) : ఎన్టీఆర్‌ 22వ వర్థంతి సందర్భంగా ఆయనకు ముఖ్యమంత్రి చంద్రబాబునాయుడు నివాళులర్పించారు. ఈ సందర్భంగా సీఎం మాట్లాడుతూ ఎన్టీఆర్‌ యుగపురుషుడు అని కొనియాడారు. ఎన్టీఆర్‌ భౌతికంగా మన మధ్య లేకపోయినా ఆయన స్పూర్తి ఎప్పుడూ మన వెన్నంటే ఉంటుందన్నారు. ఎన్టీఆర్‌ మహనీయుడని…ఆయన స్ఫూర్తితో పని చేయాలని పిలుపునిచ్చారు. ఎన్టీఆర్‌ ఆశయ సాధనకు అనుగుణంగా నడుచుకోవాలన్నారు. ఏ రంగంలో అయినా ఆయనకు ఆయనే సాటి అని సీఎం అన్నారు. రాజకీయాలకు నూతన నిర్వచనం ఇచ్చిన వ్యక్తి ఎన్టీఆర్‌ అని కొనియాడారు. సీఎంతో పాటు మంత్రులు అచ్చెన్నాయుడు, పరిటాల సునీత, డిప్యూటీ సీఎం చినరాజప్ప తదితరులు ఎన్టీఆర్‌కు నివాళులర్పించారు.